काठमाडौं । इन्डोनेसियामा २४० जना यात्रु सवार यात्रुवाहक पानीजहाज जाभा सागरमा सम्पर्कविहीन भएको छ ।
इन्डोनेसियाली खोज तथा उद्धार अधिकारीका अनुसार पूर्वी जाभाको सुराबायाबाट दक्षिण कालीमन्तानको बान्जारमासिनतर्फ जाँदै गरेको जहाज यात्राकै क्रममा सम्पर्कबाहिर पुगेको हो ।
जहाजसँग अन्तिमपटक बान्जारमासिनस्थित खोज तथा उद्धार केन्द्रबाट करिब ८० समुद्री माइल टाढा हुँदा सम्पर्क भएको थियो । त्यसपछि जहाजको अवस्थाबारे कुनै जानकारी प्राप्त नभएको अधिकारीहरूले बताएका छन् ।
जहाज हराएपछि इन्डोनेसियाली उद्धार निकायले खोजी अभियान सुरु गर्दै एउटा उद्धार जहाज घटनास्थलतर्फ पठाएको छ । उद्धार टोलीले सम्पर्कविहीन जहाजको अवस्था र त्यसमा सवार यात्रुको अवस्थाबारे जानकारी संकलन गर्ने प्रयास गरिरहेको छ ।
अधिकारीहरूका अनुसार सम्पर्क टुट्नुअघि जहाजले समुद्री क्षेत्रमा प्रतिकूल मौसमको सामना गरेको थियो । मौसमकै कारण जहाजको सम्पर्क टुटेको हो वा अन्य कुनै कारणले घटना भएको हो भन्नेबारे भने तत्काल स्पष्ट भइसकेको छैन ।
इन्डोनेसियाली अधिकारीलाई उद्धृत गर्दै चिनियाँ समाचार संस्था सिन्ह्वाले जहाज सम्पर्कविहीन भएको जानकारी दिएको हो ।
