काठमाडौं । नेपाली कांग्रेसले रसुवामा आएको ठूलो बाढीपछि उत्पन्न परिस्थितिबारे छलफल गर्न केन्द्रीय कार्यसमितिको आकस्मिक बैठक बोलाएको छ ।
कांग्रेस सभापति गगन थापाले बुधबार दिउँसो २ बजे पार्टी केन्द्रीय कार्यालय सानेपामा बैठक आह्वान गरेका हुन् । बैठकमा काठमाडौं उपत्यकामा उपलब्ध केन्द्रीय कार्यसमितिका पदाधिकारी तथा सदस्यहरूलाई उपस्थित हुन भनिएको छ ।
बैठकमा काठमाडौंमा उपलब्ध कांग्रेसका भ्रातृ तथा शुभेच्छुक संस्थाका अध्यक्षहरूका साथै रसुवा, धादिङ र नुवाकोटका जिल्ला सभापतिलाई समेत आमन्त्रण गरिएको कांग्रेसले जनाएको छ ।
यसअघि सभापति थापाले रसुवामा अप्रत्याशित रूपमा आएको ठूलो बाढीका कारण अवस्था गम्भीर र चिन्ताजनक बनेको बताएका थिए । उनले भोटेकोशी र त्रिशूली नदीको तल्लो तटीय तथा आसपासका क्षेत्रमा उच्च सतर्कता अपनाउन र सुरक्षित रहन आग्रह गरेका छन् ।
थापाले विपद्को समयमा सरकारलाई राज्यका सम्पूर्ण संयन्त्र परिचालन गर्दै सबै तहका सरकारसँग समन्वय गरी उद्धार तथा राहतमा केन्द्रित हुन आग्रह गरेका छन् ।
विपद् व्यवस्थापनमा सरकारका प्रयासमा कांग्रेसले पूर्ण साथ र सहयोग गर्ने प्रतिबद्धता जनाउँदै उनले पार्टीका सबै तहका समिति तथा सदस्यलाई उद्धार र राहतमा जुट्न अपिल गरेका छन् ।
विशेषगरी रसुवा, नुवाकोट, धादिङ, गोरखा र चितवनलगायत जिल्लाका कांग्रेस नेतृत्व तथा सदस्यलाई नदी तटीय क्षेत्रमा बसोबास गर्ने परिवारलाई सुरक्षित स्थानमा सार्न, उद्धार तथा राहत कार्यमा तत्काल सक्रिय हुन सभापति थापाले आग्रह गरेका छन् ।
