काठमाडौं । सुदूरपश्चिम प्रदेशका मुख्यमन्त्री कमलबहादुर शाह हेल्मेट नलगाई मोटरसाइकल चलाएको अभियोगमा ट्राफिक कारबाहीमा परेका छन् । मुख्यमन्त्री निवास परिसरभित्र हेल्मेटबिना बुलेट मोटरसाइकल चलाएको भिडियो सामाजिक सञ्जालमा सार्वजनिक भएपछि उनको व्यापक आलोचना भएको थियो ।
आलोचनापछि ट्राफिक प्रहरी मुख्यमन्त्री निवासमै पुगेर शाहलाई चिट काट्दै ५०० रुपैयाँ जरिवाना गरेको हो । ट्राफिक प्रहरीले जारी गरेको चिटमा ‘हेल्मेट नलगाई सवारी चलाएको’ कसुर उल्लेख गरिएको छ ।
पत्रकारहरूसँग कुरा गर्दै मुख्यमन्त्री शाहले आफूबाट ट्राफिक नियम उल्लंघन भएको स्वीकार गरे । उनले नियमअनुसार आफूलाई कारबाही गर्न ट्राफिक प्रहरीलाई आफैं आग्रह गरेको पनि बताए ।
‘म ट्राफिक प्रहरीलाई धन्यवाद दिन्छु, कानुन सबैका लागि समान हुनुपर्छ, ठूला व्यक्तिलाई कानुन नलाग्ने भन्ने हुँदैन, कानुनले व्यवस्था गरेअनुसार सबैले कारबाही भोग्नुपर्छ,’ उनले भने ।
उनले पद वा हैसियतका आधारमा कानुन कार्यान्वयनमा कुनै विभेद हुन नहुने उल्लेख गर्दै सबै नागरिकलाई ट्राफिक नियमको पूर्ण पालना गर्न आग्रह गरे ।
मुख्यमन्त्रीका प्रमुख स्वकीय सचिव प्रयागराज खनालले आफ्नो टिकटकमार्फत शाहले हेल्मेटबिना मोटरसाइकल चलाएको भिडियो सार्वजनिक गरेका थिए । केही समयदेखि वैशाखीको सहारामा हिँडिरहेका मुख्यमन्त्री साँझ मोटरसाइकल चलाएको दृश्य सार्वजनिक भएपछि सामाजिक सञ्जालमा विभिन्न टिप्पणीसमेत भएका थिए ।
