काठमाडौं । राष्ट्रिय परीक्षा बोर्डले कक्षा १२ को वार्षिक परीक्षाको नतिजा सार्वजनिक गरेको छ । शुक्रबार बसेको बोर्ड बैठकले नतिजा अनुमोदन गरेपछि सार्वजनिक गरिएको हो ।
बोर्डका अनुसार यस वर्षको परीक्षामा कुल ४ लाख १८ हजार १७० जना परीक्षार्थी सहभागी भएका थिए । तीमध्ये ६४.१३ प्रतिशत विद्यार्थी उत्तीर्ण भएका छन् ।
कक्षा १२ को परीक्षा गत वैशाख १४ गतेदेखि देशभर सञ्चालन गरिएको थियो । परीक्षाको नतिजा सार्वजनिक भएसँगै विद्यार्थीहरूले आफ्नो प्राप्ताङ्क तथा ग्रेड अनलाइन माध्यमबाट हेर्न सक्ने व्यवस्था गरिएको बोर्डले जनाएको छ ।
यसैबीच, परीक्षा सञ्चालनको क्रममा मर्यादा विपरीत गतिविधिमा संलग्न भएको ठहर गर्दै ४० जना परीक्षार्थीको परीक्षा रद्द गरिएको छ । परीक्षा रद्द हुनेमा नियमिततर्फका ३० जना र आंशिकतर्फका १० जना विद्यार्थी रहेका छन् ।
बोर्डले परीक्षा प्रणालीलाई थप व्यवस्थित, पारदर्शी र मर्यादित बनाउन आगामी दिनमा निगरानी तथा नियन्त्रणका उपायहरू थप प्रभावकारी बनाइने जनाएको छ ।
