काठमाडौं । स्वास्थ्य बिमा बोर्डले आर्थिक दबाब बढ्दै गएको कारण देखाउँदै निजी स्वास्थ्य संस्थामा आकस्मिक बाहेकका बिमा सेवा स्थगित गर्ने निर्णय गरेको छ ।
बोर्डकी निमित्त कार्यकारी निर्देशक शकुन्तला प्रजापतिले जारी गरेको सूचनाअनुसार जेठ १६ गतेदेखि लागू हुने गरी निजी अस्पतालहरूमा आपतकालीन सेवा बाहेक अन्य सबै स्वास्थ्य बिमा सेवा रोकिएको हो ।
बोर्डको जेठ ११ गते बसेको बैठकले वित्तीय संकटलाई मध्यनजर गर्दै यस्तो निर्णय गरेको जनाएको छ । सूचनामा अर्को निर्णय नआएसम्म निजी स्वास्थ्य संस्थाबाट प्रदान गरिने आकस्मिक सेवा बाहेकका बिमा सेवाहरू स्थगन रहने उल्लेख गरिएको छ।
