काठमाडौं । युनाइटेड अरब इमिरेट्स (यूएई) सरकारले पवित्र रमजानको अवसर पारेर १२८ जना नेपाली कैदीलाई आममाफी दिएको छ । यस कदमप्रति नेपाल सरकारले धन्यवाद र कृतज्ञता व्यक्त गरेको छ ।
परराष्ट्र मन्त्रालयले बुधबार जारी गरेको विज्ञप्तिमा रमजानको शुभ अवसरमा नेपाली नागरिकहरूलाई माफी दिएकोमा यूएई सरकारप्रति हार्दिक आभार प्रकट गरिएको उल्लेख छ । साथै, यूएईले मानवीय आधारमा लिएको उक्त निर्णयलाई नेपाल सरकारले उच्च मूल्यांकन गरेको जनाएको छ ।
मन्त्रालयका अनुसार अबुधाबीस्थित नेपाली दूतावासमार्फत गरिएको पहल र अनुरोधपछि यूएई सरकारले १२८ नेपाली कैदीलाई आममाफी दिएको हो ।
