रुमन श्रेष्ठ
पाटन । पहिले अतिक्रमण र बेवास्ताले संकटमा परेको ललितपुरको लगनखेलस्थित ऐतिहासिक सप्तपाताल पोखरी अहिले मानिसहरूको चहलपहलले भरिन थालेको छ । पुनःस्थापनापछि पोखरीसँगै निर्माण गरिएको पार्कमा घुम्न, रमाउन र समय बिताउन आउनेको संख्या बढ्दै गएको छ ।
ललितपुर महानगरपालिकाले नमुना मच्छिन्द्र माध्यमिक विद्यालयको भवन हटाएर पोखरी पुनर्निर्माण गरेको हो । लगनखेल वातावरण संरक्षण समितिसँगको सहकार्यमा पोखरी आसपास पार्कसमेत निर्माण गरिएको छ ।
पुनर्निर्माणपछि पोखरी अहिले सर्वसाधारणका लागि खुला र आकर्षक गन्तव्य बनेको छ । बिहान–बेलुका घुम्न आउनेदेखि परिवार तथा साथीभाइसँग समय बिताउन आउनेसम्मको उपस्थिति देखिन थालेको छ । पोखरीको किनार र पार्कमा बसेर वातावरणको आनन्द लिनेहरूका कारण क्षेत्रको रौनकसमेत बढेको छ ।
लिच्छविकालीन इतिहाससँग जोडिएको सप्तपाताल पोखरी लामो समयसम्म अतिक्रमण र संरक्षण अभावका कारण जीर्ण बनेको थियो । यसको संरक्षणका लागि २०६१ सालदेखि सुरु भएको कानुनी लडाइँमा सर्वोच्च अदालतले २०७६ सालमा अतिक्रमित १४ रोपनी जग्गा पोखरीकै नाममा फिर्ता गर्न आदेश दिएको थियो । थप ३२ रोपनी जग्गा फिर्ताको प्रक्रिया पनि अघि बढाइएको छ ।
वर्षौँको विवाद र उपेक्षापछि पुनःजीवन पाएको सप्तपाताल अहिले ऐतिहासिक सम्पदासँगै शहरभित्र घुमफिर र विश्राम गर्ने नयाँ गन्तव्यका रूपमा समेत स्थापित हुँदै गएको छ ।
