नेपालगन्ज । लामो समयदेखि बन्द रहेको नेपालगन्ज–पोखरा नियमित हवाई सेवा भदौ ३१ गतेदेखि पुनः सञ्चालन हुने भएको छ। निजी वायुसेवा कम्पनी बुद्ध एयरले यात्रुको माग बढेपछि यो रुटमा पुनः नियमित उडान सुरु गर्न लागेको हो।
बुद्ध एयर नेपालगन्जका प्रमुख विनीतविक्रम शाहका अनुसार नेपालगन्जबाट पोखरा जाने यात्रुको संख्या बढ्नुका साथै भारतको उत्तर प्रदेशबाट आउने धार्मिक पर्यटकको आवागमन पनि बढेकाले उडान पुनः सञ्चालन गर्ने निर्णय गरिएको हो।
नेपालगन्ज–पोखरा उडानले भारतको उत्तर प्रदेश क्षेत्रलाई पोखरासँग हवाईमार्फत जोड्ने भएकाले धार्मिक तथा पर्यटन आवागमनका लागि महत्वपूर्ण मानिन्छ। यसअघि गत जेठ ५ गतेदेखि यो सेवा स्थगित गरिएको थियो। भारतबाट आउने धार्मिक पर्यटकको संख्या घट्नु र सञ्चालन खर्चमा इन्धनको हिस्सा बढ्नुका कारण उडान रोकिएको बुद्ध एयरले जनाएको थियो।
पछिल्लो समय पर्यटकको चहलपहल बढेसँगै उक्त रुटमा यात्रुको माग पनि बढेपछि कम्पनीले सेवा पुनः सुरु गर्न लागेको हो। बुद्ध एयरका अनुसार अब नेपालगन्ज–पोखरा उडान सातामा तीन दिन हुनेछ। आइतबार, बुधबार र शुक्रबार उडान सञ्चालन हुने गरी तालिका तय गरिएको छ भने यात्रुका लागि बुकिङसमेत खुला गरिएको छ।
उडान पुनः सञ्चालन हुने भएपछि बाँकेका पर्यटन व्यवसायी उत्साहित भएका छन्। यसले नेपालगन्ज र पोखराबीचको पर्यटन तथा व्यावसायिक आवागमनलाई सहज बनाउने अपेक्षा गरिएको छ।
स्थानीय पर्यटन व्यवसायीको लामो पहलपछि २०७८ साल साउन १७ गतेदेखि नेपालगन्ज–पोखरा रुटमा सातामा तीन दिन नियमित उडान सुरु गरिएको थियो। सेवा पुनः सञ्चालन भएसँगै यस क्षेत्रका पर्यटन व्यवसायीले पर्यटक आवागमन थप बढ्ने अपेक्षा गरेका छन्।
