काठमाडौं । प्रधानमन्त्री बालेन्द्र शाह र एसियाली विकास बैंक (एडीबी) का अध्यक्ष मासातो कान्दाबीच शिष्टाचार भेटवार्ता भएको छ । मंगलबार बिहान प्रधानमन्त्री तथा मन्त्रिपरिषद्को कार्यालय सिंहदरबारमा भएको भेटमा नेपाल–एडीबी सहकार्य, विकास आयोजना तथा आर्थिक सहयोगका विषयमा छलफल भएको हो ।
भेटका क्रममा नेपालमा सञ्चालन भइरहेका एडीबी सहयोगका परियोजना, आगामी सहकार्यका क्षेत्र तथा विकास साझेदारीलाई थप प्रभावकारी बनाउने विषयमा छलफल गरिएको जनाइएको छ ।
यसअघि सोमबार नेपाल सरकार र एडीबीबीच दुईवटा आयोजना तथा कार्यक्रम कार्यान्वयनका लागि १६५ मिलियन अमेरिकी डलर (करिब २५ अर्ब रुपैयाँ) बराबरको सहुलियतपूर्ण ऋण सम्झौता भएको थियो ।
अर्थ मन्त्रालयका अनुसार सम्झौताअन्तर्गत ‘एकीकृत खानेपानी तथा ढल व्यवस्थापन आयोजना’ का लागि ११५ मिलियन अमेरिकी डलर (करिब १७ अर्ब ५० करोड रुपैयाँ) ऋण परिचालन गरिनेछ । उक्त रकम स्थानीय तहमा खानेपानी सेवा विस्तार, ढल व्यवस्थापन तथा आवश्यक पूर्वाधार निर्माणमा प्रयोग गरिनेछ ।
एडीबीले नेपालमा लामो समयदेखि पूर्वाधार विकास, ऊर्जा, सहरी विकास, खानेपानी तथा सरसफाइ क्षेत्रलगायतमा आर्थिक तथा प्राविधिक सहयोग गर्दै आएको छ । नेपाल सरकारसँगको सहकार्यलाई आगामी दिनमा थप विस्तार गर्ने विषयमा पनि भेटका क्रममा छलफल भएको बताइएको छ ।
