सिरहाको लहानस्थित एक होटलमा बिक्रीका लागि राखिएको सिलबन्दी पानीको बोतलभित्र छेपारो भेटिएपछि प्रशोधित पानी उत्पादक ‘ऋषि जल’ कम्पनी कारबाहीमा परेको छ । इलाका प्रशासन कार्यालय लहानले केवी एण्ड सन्स नेपाल कम्पनी लाई उपभोक्ता संरक्षण ऐन, २०७५ अनुसार २ लाख रुपैयाँ जरिबाना गरेको जनाएको हो ।
प्रशासनका अनुसार असार १० गते लहान नगरपालिका–३ स्थित न्यू भान्जा होटलमा बिक्रीका लागि राखिएको ‘ऋषि जल’ को बोतलभित्र छेपारो देखिएको भन्दै उपभोक्ताबाट गुनासो प्राप्त भएपछि तत्काल अनुगमन गरिएको थियो ।
अनुगमनका क्रममा कम्पनीले उपभोक्ताको स्वास्थ्यमा गम्भीर असर पर्ने लापरवाही गरेको तथा अनुचित व्यापारिक गतिविधि सञ्चालन गरेको निष्कर्ष निकाल्दै प्रशासनले जरिबानासहित कारबाही गरेको हो ।
यसअघि पनि सोही कम्पनीको पानीबारे विभिन्न गुनासा आएको उल्लेख गर्दै प्रशासनले कम्पनी सञ्चालकलाई कार्यालयमा बोलाएर सचेत गराएको छ । साथै, बजारमा पठाइएका उक्त ब्याचका सबै ‘ऋषि जल’ का बोतल तत्काल फिर्ता गर्न निर्देशन दिइएको छ ।
प्रशासनले भविष्यमा यस्ता घटना दोहोरिए कानुनअनुसार थप कडा कारबाही गरिने चेतावनी दिएको छ । साथै, उपभोक्तालाई खाद्य तथा पेय पदार्थ खरिद गर्दा सावधानी अपनाउन र कुनै त्रुटि वा शंकास्पद वस्तु भेटिए तत्काल सम्बन्धित निकायमा जानकारी गराउन आग्रह गरेको छ ।
