काठमाडौं । ग्लोबल आईएमई बैंकका कर्मचारी पिताम्बर खड्का आफ्नै घरमा मृत अवस्थामा फेला परेका छन् । प्रारम्भिक अनुसन्धान तथा पोष्टमार्टम रिपोर्टका आधारमा उनले आत्महत्या गरेको पुष्टि भएको प्रहरीले जनाएको छ ।
प्रहरीका अनुसार सोमबार बेलुकी खड्काले घरको भुइँतल्लामा रहेको कोठामा सिलिङमा डोरीको पासो लगाएर आत्महत्या गरेका हुन् । उनलाई झुण्डिएको अवस्थामा देखेपछि उनका पिता महेश खड्काले प्रहरीलाई खबर गरेका थिए ।
सूचना पाएपछि घटनास्थल पुगेको प्रहरीले स्थानीय जनप्रतिनिधिको उपस्थितिमा घटनास्थल मुचुल्का तयार गरी शवलाई पोष्टमार्टमका लागि अस्पताल पठाएको थियो । घटनास्थलबाट मोबाइल लगायतका सामग्री नियन्त्रणमा लिएर थप अनुसन्धान अघि बढाइएको प्रहरीले जनाएको छ ।
घटनाअघि खड्काले सामाजिक सञ्जालमा बैंकका केही वरिष्ठ कर्मचारीको नाम र तस्बिर सार्वजनिक गरेका थिए । उनले बैंकका प्रमुख कार्यकारी अधिकृत सुरेन्द्रराज रेग्मी, सहायक प्रमुख कार्यकारी अधिकृत दीपचन्द्र रेग्मी, मानव संसाधन प्रमुख अनामिका सिंह कुँवर तथा डेपुटी सिइओ सुमन पोखरेललाई उल्लेख गर्दै पोस्ट गरेका थिए ।
प्रहरीले खड्काले उल्लेख गरेका वरिष्ठ कर्मचारी, उनी कार्यरत शाखाका कर्मचारी तथा सम्बन्धित प्रदेश कार्यालयका पदाधिकारीसँग पनि बयान लिने तयारी गरेको छ ।
स्रोतका अनुसार केही समयअघि बैंकले खड्कासँग स्पष्टीकरण मागेको थियो । त्यसपछि उनले राजीनामा दिएका थिए । यद्यपि, स्पष्टीकरण कुन विषयमा मागिएको थियो भन्ने खुलेको छैन । राजीनामा स्वीकृत भएकै दिन उनले सामाजिक सञ्जालमा ‘तिमीहरूले मलाई मार्यौ’ भन्ने सन्देश लेखेको खुलेको छ ।
खड्का यसअघि बैंकको चारआली शाखामा शाखा प्रबन्धकका रूपमा कार्यरत थिए । पछि उनलाई विराटनगरस्थित प्रादेशिक कार्यालयमा सरुवा गरिएको थियो । ग्लोबल आईएमई बैंकमा आउनुअघि उनी ज्योति विकास बैंकमा कार्यरत रहेको जानकारी प्राप्त भएको छ ।
घटनापछि उत्पन्न परिस्थितिबारे बैंक व्यवस्थापनभित्र आन्तरिक छलफल भइरहेको स्रोतले जनाएको छ । प्रहरीले घटनाबारे विस्तृत अनुसन्धान जारी राखेको छ ।
