काठमाडौं । भदौ २३ मा राजधानीको बानेश्वर क्षेत्रमा भएको गोलीकाण्डसम्बन्धी छानबिन प्रतिवेदन सार्वजनिक भएसँगै राजनीतिक वृत्तमा तरंग पैदा भएको छ। पूर्वन्यायाधीश गौरीबहादुर कार्की नेतृत्वको आयोगले उक्त घटनामा तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखकलाई मुख्य जिम्मेवार ठहर गरेको हो।
आयोगको निष्कर्षपछि सरकारले प्रतिवेदन कार्यान्वयन गर्ने निर्णय लिएको छ। सोही निर्णयका आधारमा प्रहरीले पूर्वगृहमन्त्री रमेश लेखकलाई निवासबाटै पक्राउ गरेको छ। मन्त्रिपरिषद्का कागजातसहित पुगेको प्रहरी टोलीले उनलाई राति नै नियन्त्रणमा लिएको हो।
उता, एमाले अध्यक्ष केपी शर्मा ओलीलाई पक्राउ गर्न पनि प्रहरी सक्रिय बनेको छ। काठमाडौं उपत्यका अपराध अनुसन्धान कार्यालय र केन्द्रीय अनुसन्धान ब्यूरो (सीआईबी)को संयुक्त टोली ओलीको निवासमा पुगेको छ। उनलाई सहज रूपमा गिरफ्तारी दिन आग्रह गर्दै आवश्यक प्रक्रिया अघि बढाइएको प्रहरीले जनाएको छ।
ओलीलाई नियन्त्रणमा लिन रातिदेखि नै सुरक्षा निकाय परिचालित भएका छन्। भक्तपुरसहित विभिन्न स्थानबाट खटिएका प्रहरी टोलीले आवश्यक सुरक्षा र समन्वय गरिरहेका छन्।
स्मरणीय छ, ओली नेतृत्वको सरकार रहेका बेला भदौ २३ र २४ गते भएको जेनजी आन्दोलन हिंसात्मक बन्दा ७६ जनाको ज्यान गएको थियो। सो घटनाको जिम्मेवारीसम्बन्धी निष्कर्ष सार्वजनिक भएसँगै अहिले त्यसको कार्यान्वयन प्रक्रिया अघि बढाइएको हो।
