काठमाडौं । नेपाली कांग्रेसका सभापति गगन थापाले आफ्नो पदबाट राजीनामा दिएका छन्। फागुन २१ गते सम्पन्न प्रतिनिधिसभा निर्वाचनमा पराजित भएपछि उनले बुधबार उपसभापति विश्वप्रकाश शर्मासमक्ष राजीनामा बुझाएका हुन्।
यसअघि काठमाडौं–४ बाट निर्वाचित हुँदै आएका थापा यसपटक सर्लाही–४ बाट उम्मेदवार बनेका थिए। उक्त क्षेत्रमा उनलाई राष्ट्रिय स्वतन्त्र पार्टीका डा. अमरेशकुमार सिंहले हराएका थिए।
चुनाव परिणामअनुसार रास्वपाले झन्डै दुई तिहाइ सिट जित्दै अग्रस्थान बनाउँदा, दोस्रो स्थानमा रहेको कांग्रेसले प्रत्यक्षतर्फ १८ र समानुपातिकतर्फ २० गरी कुल ३८ सिटमा सीमित रह्यो। परिणाम सार्वजनिक भएपछि थापाले राजीनामाको तयारी थालेका थिए। यद्यपि, पार्टीका विभिन्न तहका नेताहरूले उनलाई पदमा रहन सुझाव दिँदै आएका थिए।
निर्वाचनअघि विशेष महाधिवेशनमार्फत सर्वसम्मत रूपमा सभापति बनेका थापाको राजीनामाबारे अन्तिम निर्णय भने आगामी केन्द्रीय कार्यसमिति बैठकले गर्नेछ। सो बैठक शुक्रबारका लागि तय गरिएको छ।
