काठमाडौं । माउन्ट एभरेष्ट पावर डेभलपमेन्ट लिमिटेडले सर्वसाधारणका लागि जारी गरेको प्रारम्भिक सार्वजनिक निष्काशन (आईपीओ) शुक्रबार बिहान बाँडफाँट गरेको छ । कम्पनीको शेयर निष्काशन तथा बिक्री प्रबन्धक एनआईएमबि एस क्यापिटलको कार्यालयमा गोलाप्रथामार्फत आईपीओ बाँडफाँट गरिएको हो ।
कम्पनीले असार ३ गतेदेखि ८ गतेसम्म प्रतिकित्ता १०० रुपैयाँ अंकित मूल्यका १४ लाख २७ हजार ६०० कित्ता शेयर सर्वसाधारणका लागि बिक्री खुला गरेको थियो । यसबाट कम्पनीले कुल १४ करोड २७ लाख ६० हजार रुपैयाँ बराबरको पूँजी संकलन गरेको छ ।
आईपीओमा कुल २८ लाख ६२ हजार ९०९ जनाबाट ३ करोड ६ लाख ५५ हजार ४३० कित्ता शेयर खरिदका लागि आवेदन परेको थियो । तीमध्ये २८ लाख १५ हजार ६७९ आवेदन स्वीकृत भएका छन् भने बाँकी आवेदन विभिन्न कारणले रद्द भएका छन् ।
मागभन्दा धेरै आवेदन परेकाले गोलाप्रथा प्रणालीबाट शेयर बाँडफाँट गरिएको हो। यसअनुसार १ लाख ४२ हजार ७६० जना आवेदकले जनही १० कित्ताका दरले कम्पनीको आईपीओ प्राप्त गरेका छन्।
