काठमाडौं । नेपाल आयल निगमले पेट्रोलियम पदार्थको खुद्रा बिक्री मूल्य घटाएको छ । निगम सञ्चालक समितिको मंगलबारको निर्णयअनुसार नयाँ मूल्य बुधबार राति १२ः०१ बजेदेखि लागू भएको हो ।
नयाँ व्यवस्थाअनुसार पेट्रोलको मूल्य प्रतिलिटर २० रुपैयाँ, डिजेल तथा मट्टितेलको मूल्य प्रतिलिटर ३० रुपैयाँ, आन्तरिक हवाई इन्धनको मूल्य प्रतिलिटर ४० रुपैयाँ र एलपी ग्यासको मूल्य प्रतिसिलिन्डर १०० रुपैयाँले घटाइएको निगमले जनाएको छ । त्यस्तै अन्तर्राष्ट्रिय हवाई इन्धन (काठमाडौं) को मूल्य प्रतिकिलोलिटर २६५ अमेरिकी डलरले घटाइएको छ ।
मूल्य समायोजनपछि पेट्रोलको खुद्रा बिक्री मूल्य पहिलो, दोस्रो र तेस्रो वर्गमा क्रमशः प्रतिलिटर १९४ रुपैयाँ ५० पैसा, १९६ रुपैयाँ र १९७ रुपैयाँ कायम भएको छ ।
यस्तै डिजेल तथा मट्टितेलको मूल्य पहिलो वर्गमा १९२ रुपैयाँ ५० पैसा, दोस्रो वर्गमा १९४ रुपैयाँ र तेस्रो वर्गमा १९५ रुपैयाँ प्रतिलिटर निर्धारण गरिएको छ ।
निगमका अनुसार आन्तरिक हवाई इन्धनको नयाँ मूल्य प्रतिलिटर २२९ रुपैयाँ कायम गरिएको छ । एलपी ग्यासको मूल्य प्रतिसिलिन्डर २ हजार ६० रुपैयाँ तथा आधा सिलिन्डरको मूल्य १ हजार ३० रुपैयाँ तोकिएको छ ।
