काठमाडौं । डिफेन्डिङ च्याम्पियन अर्जेन्टिनाले अतिरिक्त समयसम्म लम्बिएको रोमाञ्चक खेलमा केपभर्डेलाई ३–२ ले पराजित गर्दै विश्वकप फुटबलको अन्तिम १६ मा स्थान बनाएको छ ।
खेलको २९औँ मिनेटमा कप्तान लियोनल मेस्सीले गोल गर्दै अर्जेन्टिनालाई अग्रता दिलाए । योसँगै उनले जारी विश्वकपमा आफ्नो सातौँ तथा विश्वकप इतिहासमा २०औँ गोल पूरा गरे ।
दोस्रो हाफको ५८औँ मिनेटमा ड्रोए डुवार्टेले गोल गर्दै केपभर्डेलाई १–१ को बराबरीमा फर्काए । त्यसपछि निर्धारित ९० मिनेटमा दुवै टोलीबाट थप गोल हुन नसकेपछि खेल अतिरिक्त समयमा पुगेको थियो ।
अतिरिक्त समयको ९२औँ मिनेटमा लिसान्द्रो मार्टिनेजले गोल गर्दै अर्जेन्टिनालाई पुनः २–१ को अग्रता दिलाए। तर १०३औँ मिनेटमा सिड्ने लोपस क्याब्रेलले गोल गर्दै केपभर्डेलाई फेरि २–२ को बराबरीमा पुर्याए ।
खेलको १११औँ मिनेटमा केपभर्डेका डिनी बोर्गसबाट आत्मघाती गोल भएपछि अर्जेन्टिनाले ३–२ को निर्णायक अग्रता बनायो, जुन अन्तिमसम्म कायम रह्यो ।
यस जितसँगै अर्जेन्टिनाले अन्तिम १६ मा स्थान सुरक्षित गरेको छ । अब अर्जेन्टिनाले प्रि–क्वार्टरफाइनलमा इजिप्टसँग प्रतिस्पर्धा गर्नेछ ।
