काठमाडौं । सरकारले नयाँ कार्यविभाजन नियमावली तथा भूमि सम्बन्धी संशोधित नियमहरू पारित गरेको छ । बुधबार सिंहदरबारमा बसेको मन्त्रिपरिषद् बैठकले ‘नेपाल सरकार कार्यविभाजन नियमावली, २०८३’ स्वीकृत गर्ने निर्णय गरेको हो ।
बैठकका निर्णय सार्वजनिक गर्दै सञ्चार तथा सूचना प्रविधिमन्त्री डा. विक्रम तिमिल्सिनाले प्रशासनिक तथा कानुनी प्रक्रिया थप प्रभावकारी बनाउन ‘विद्युतीय सुशासन आयोग (गठन तथा सञ्चालन) आदेश, २०७९’ संशोधन प्रस्तावलाई पनि स्वीकृति दिइएको जानकारी दिए ।
त्यसैगरी, मन्त्रिपरिषद्ले भूमि व्यवस्थापनसँग सम्बन्धित कानुनी व्यवस्था परिमार्जन गर्दै ‘भूमि सम्बन्धी २१औँ संशोधन नियमहरू, २०८३’ लाई अनुमोदन गरेको छ ।
बैठकले सरकारी लगानी व्यवस्थापन समितिमा दुई जना प्रतिनिधिसभा सदस्यलाई मनोनयन गर्ने निर्णयसमेत गरेको छ । समितिमा सांसद सुशील खड्का र सांसद योगेश गौचन थकालीलाई सदस्य बनाइएको छ ।
