नेपाली कांग्रेसले पार्टीको आन्तरिक अवस्था र हालैको निर्वाचन परिणामबारे समीक्षा गर्न केन्द्रीय समिति बैठक बोलाएको छ। कार्यवाहक मुख्यसचिव कृष्णप्रसाद दुलालका अनुसार चैत ६ गते शुक्रबार दिउँसो १ बजे ललितपुरको सानेपास्थित केन्द्रीय कार्यालयमा बैठक बस्नेछ।
बैठकमा केन्द्रीय सदस्यहरूसँगै प्रदेश सभापतिहरूलाई पनि सहभागी हुन निमन्त्रणा गरिएको छ। बैठकको मुख्य एजेन्डा हालै सम्पन्न प्रतिनिधि सभा निर्वाचनको समीक्षा र पार्टीको आगामी रणनीतिमा केन्द्रित रहने बताइएको छ।
फागुन २१ गते सम्पन्न प्रतिनिधि सभा निर्वाचनमा कांग्रेसले प्रत्यक्षतर्फ १८ र समानुपातिकतर्फ २० गरी कुल ३८ सिट जितेको थियो। तर, सभापति गगन थापासहित प्रमुख पदाधिकारीहरू निर्वाचनमा पराजित भएपछि पार्टीभित्र असन्तुष्टि बढेको छ।
यसैबीच, पार्टीभित्र सभापति थापाको राजीनामा माग उठिरहेको छ। उपसभापति विश्वप्रकाश शर्मासँगको छलफलमा थापाले राजीनामा दिने संकेत गरे पनि उनलाई पदमै रहन सुझाव दिइएको स्रोतले जनाएको छ।
साथै, कांग्रेसभित्र नियमित महाधिवेशनको मिति तय गर्नुपर्ने आवाज पनि बलियो बन्दै गएको छ।
