काठमाडौं । अफगानिस्तानको राजधानी काबुलस्थित लागुऔषध प्रयोगकर्ताहरूका लागि सञ्चालनमा रहेको अस्पतालमा भएको हवाई आक्रमणमा कम्तीमा ४०० जनाको मृत्यु भएको अफगानिस्तानले जनाएको छ । उक्त घटनामा करिब २५० जना घाइते भएका छन् ।
अफगानिस्तानका सरकारी उप–प्रवक्ता हमदुल्लाह फित्रतका अनुसार स्थानीय समयअनुसार राति करिब ९ बजे भएको आक्रमणले दुई हजार शैय्या क्षमताको अस्पतालको ठूलो भाग ध्वस्त बनाएको छ । उनले सामाजिक सञ्जाल एक्समार्फत् जानकारी दिँदै उद्धार टोलीहरू आगो नियन्त्रण र भग्नावशेषबाट शव निकाल्ने कार्यमा खटिएको बताएका छन् ।
स्थानीय टेलिभिजनहरूले सार्वजनिक गरेका दृश्यहरूमा सुरक्षा निकायका सदस्यहरू टर्चलाइटको सहायताले घाइते तथा मृतकलाई भग्नावशेषबाट बाहिर निकाल्दै गरेको र अग्निनियन्त्रकहरूले भवनमा लागेको आगो निभाउन प्रयास गरिरहेको देखिन्छ ।
यो घटना गत महिनाको अन्त्यतिर सुरु भएको अफगानिस्तान–पाकिस्तान तनावको अर्को श्रृंखला भएको बताइएको छ । सीमाक्षेत्रमा बारम्बार झडप हुनुका साथै अफगानिस्तानभित्र हवाई आक्रमणहरू भइरहेको जनाइएको छ । युद्धविरामका लागि अन्तर्राष्ट्रिय समुदायले गरेको आह्वानलाई पनि हालसम्म बेवास्ता गरिएको छ ।
यद्यपि पाकिस्तानले भने अस्पताललाई लक्षित गरी आक्रमण गरिएको आरोप अस्वीकार गरेको छ । पाकिस्तानका अधिकारीहरूले पूर्वी अफगानिस्तानमा गरिएको आफ्ना आक्रमणहरूमा कुनै पनि नागरिक संरचना वा क्षेत्रलाई निशाना नबनाइएको दाबी गरेका छन् ।
अफगान सरकारी प्रवक्ता जबिहुल्लाह मुजाहिदले उक्त आक्रमणको कडा निन्दा गर्दै पाकिस्तानले नागरिक संरचना तथा अस्पताललाई लक्षित गरेर आतंक फैलाएको आरोप लगाएका छन् । उनले यस्तो कार्य मानवताविरुद्धको अपराध भएको बताएका छन् ।
उता, पाकिस्तानी प्रधानमन्त्री शहबाज शरिफका प्रवक्ता मोसर्रफ जैदीले अफगानिस्तानको आरोपलाई निराधार भन्दै खारेज गरेका छन् । उनका अनुसार काबुलस्थित कुनै पनि अस्पताललाई निशाना बनाइएको छैन ।
यसअघि पाकिस्तानको सूचना मन्त्रालयले सामाजिक सञ्जालमार्फत जारी गरेको भनाइमा अफगान तालिवान र अफगानिस्तानमा सक्रिय पाकिस्तानी लडाकूहरूको सैन्य अखडा, प्राविधिक उपकरण तथा गोलाबारुद भण्डारण केन्द्रलाई लक्षित गरी काबुल र नान्गहार क्षेत्रमा आक्रमण गरिएको दाबी गरिएको थियो । पाकिस्तानले ती स्थानहरू निर्दोष पाकिस्तानी नागरिकविरुद्ध प्रयोग भइरहेको आरोप समेत लगाएको छ ।
