काठमाडौं । नेपाली राष्ट्रिय महिला फुटबल टोलीकी प्रमुख स्ट्राइकर सावित्रा भण्डारी ‘साम्बा’को घुँडामा सफल शल्यक्रिया गरिएको छ ।
बुधबार बिहान सामाजिक सञ्जालमार्फत जानकारी दिँदै उनले न्युजिल्यान्डको अकल्यान्डमा डाक्टर साइमनको नेतृत्वमा रहेको चिकित्सक टोलीले शल्यक्रिया सफलतापूर्वक सम्पन्न गरेको बताएकी हुन् ।
साम्बाका अनुसार खाडी क्षेत्रको प्रतिकूल परिस्थितिका कारण कतारस्थित अस्पेटार अस्पतालमा उपचार गर्न असहज भएपछि विशेषज्ञको सल्लाहमा न्युजिल्यान्डमै शल्यक्रिया गराइएको हो । अब उनी चिकित्सकको निगरानीमा पुनस्र्थापना प्रक्रिया अघि बढाउने र स्वास्थ्य अवस्था सुधार भएसँगै अस्पेटारमा निरन्तरता दिने उनले बताएकी छन् ।
उपचारको क्रममा सहयोग गर्ने वेलिङ्टन र अकल्यान्डमा बसोबास गर्ने नेपाली समुदाय, आफू आवद्ध क्लब वेलिङ्टन फिनिक्स तथा व्यवस्थापन टिमप्रति उनले आभार व्यक्त गरेकी छन् ।
यसअघि उनले गत फागुन १४ गते उपचारका लागि आर्थिक सहयोगको अपिल गरेकी थिइन् । घुँडाको एसीएलमा गरिएको पुरानो ग्राफ्ट र एमसिएल दुवैमा समस्या देखिएकाले जटिल शल्यक्रिया आवश्यक परेको र यसको खर्च करिब ८० हजार अमेरिकी डलर (१ करोड १५ लाख रुपैयाँभन्दा बढी) लाग्ने अनुमान गरिएको थियो । विभिन्न संघसंस्था र शुभेच्छुकबाट सहयोग प्राप्त भएपछि उनले २४ घण्टाभित्रै धन्यवाद दिँदै सहयोग संकलन बन्द गरेकी थिइन् ।
