नेपाल कम्युनिस्ट पार्टी (माओवादी) का महासचिव नेत्रविक्रम चन्द ‘विप्लव’ले सरकारले विद्यार्थी संगठनहरू खारेज गर्ने नीतिको विरोध गर्दै भइरहेको आन्दोलनप्रति पार्टीको पूर्ण समर्थन रहेको बताएका छन् ।
उनले विद्यार्थी संगठनहरूलाई आन्दोलन अझ सशक्त र प्रभावकारी बनाउन आग्रह पनि गरेका छन् ।
सामाजिक सञ्जालमा आइतबार लेख्दै विप्लवले सरकारले लिएको यस्तो नीतिलाई निरङ्कुश सोचको अभिव्यक्ति भन्दै आलोचना गरेका छन् । उनका अनुसार विद्यार्थी संगठनहरू सचेतना, खबरदारी, न्याय, विद्रोह र परिवर्तनका महत्वपूर्ण वाहक हुन् ।
उनले नेपालका इतिहासमा पनि निरङ्कुश शासकहरूको अन्त्यमा विद्यार्थीहरूको भूमिका अग्रणी रहेको उल्लेख गरेका छन् ।
साथै विप्लवले परिवर्तनका लागि योगदान गर्ने संस्था र शक्तिहरूलाई नै कमजोर पार्ने प्रयास भएमा त्यसको असर अन्ततः सरकारमै पर्ने चेतावनीसमेत दिएका छन् ।
