काठमाडौं । यातायात व्यवस्था विभागको सर्भरमा समस्या देखिएपछि विभागअन्तर्गतका केही महत्वपूर्ण सेवाहरू अर्को सूचना जारी नभएसम्मका लागि स्थगित भएका छन् ।
विभागले जारी गरेको सूचनाअनुसार सवारी चालक अनुमतिपत्र (लाइसेन्स) वितरण, दुईपांग्रे सवारी साधनको ब्लुबुक नवीकरण तथा लिखित परीक्षालगायतका सेवाहरू अस्थायी रूपमा रोकिएका हुन् ।
विभागका प्रवक्ता गणेशमान सिंह राईका अनुसार आर्थिक वर्षको अन्त्य भएकाले केही प्रणाली (सिस्टम) अद्यावधिक गर्नुपर्ने अवस्था रहेको र सर्भरमा समेत समस्या देखिएकाले सेवा स्थगित गर्नुपरेको हो ।
सर्भर समस्या समाधान भएपछि सेवा पुनः सञ्चालन हुने विभागले जनाएको छ ।
काठमाडौं । साताको पहिलो कारोबार दिन सोमबार नेपाल स्टक एक्सचेन्ज (नेप्से) परिसूचक ओरालो लागेको छ । आज नेप्से परिसूचक ३० दशमलव ६० अंकले घटेर दुई हजार ५७० दशमलव १८ बिन्दुमा कायम भएको हो ।
सोमबार बजारमा ४ करोड १७ लाख २५ हजार ३२३ कित्ता शेयर कारोबार हुँदा कुल ७ अर्ब ४६ करोड ८४ लाख रुपैयाँ बराबरको कारोबार भएको छ ।
आज कारोबारमा आएका ३६८ धितोपत्रमध्ये २२ वटाको शेयर मूल्य बढ्दा २४९ वटाको मूल्य घटेको छ । यस्तै चारवटा धितोपत्रको मूल्य भने स्थिर रह्यो ।
सोमबार सबै समूहको उपसूचक घटेको छ । यसदिन व्यापार सर्वाधिक २ दशमलव ३ प्रतिशतले बढेको छ ।
यसैगरी होटेल तथा पर्यटन १ दशमलव ९९, हाइड्रोपावर १ दशमलव ९८, उत्पादन तथा प्रशोधन १ दशमलव ३६, फाइनान्स १ दशमलव ३२, जीवन बीमा १ दशमलव ०७, लगानी शून्य दशमलव ८८, माइक्रोफाइनान्स शून्य दशमलव ८७, अन्य शून्य दशमलव ८५, विकास बैंक शून्य दशमलव ८३, म्युचुअल फण्ड शून्य दशमलव ८१, निर्जीवन बीमा शून्य दशमलव ७५ र बैंकिङ समूहको उपसूचक शून्य दशमलव ६८ प्रतिशतले घटेको छ ।
आज सामुदायिक लघुवित्त ५ दशमलव ३७ र आत्मानिर्भर लघुवित्तको शेयर मूल्य ५ प्रतिशतले बढेको छ ।
यसदिन उपकार लघुवित्त ११ दशमलव २८, बुद्धभुमि नेपाल हाइड्रोपावर ७ दशमलव ४७, दिब्यश्वरी हाइड्रोपावर ६ दशमलव ५१, हिम स्टार उर्जा ६ दशमलव ४२ र टक्सार पिखु वाखोला हाइड्रोपावरको शेयर मूल्य ६ दशमलव २४ प्रतिशतले ह्रास आएको छ ।
काठमाडौं । एक महिना अघिसम्म ४८ राष्ट्रको सपना बोकेको विश्व फुटबलको महाउत्सव अब चार टोलीमा सीमित भएको छ । अब प्रत्येक पास, प्रत्येक गोल र प्रत्येक निर्णयले इतिहास लेख्ने वा मेटाउनेछ । विश्वकप २०२६ को सेमिफाइनलमा अर्जेन्टिना, स्पेन, फ्रान्स र इङ्ल्यान्ड उभिएका छन् । चार फरक फुटबल दर्शन, चार फरक यात्रा तर एउटै लक्ष्य-विश्व विजेता बन्ने ।
समूह चरणदेखि क्वार्टरफाइनलसम्मको यात्राले देखाएको एउटा स्पष्ट सन्देश छ-यसपटक कुनै पनि टोली संयोगवश अन्तिम चारमा पुगेको होइन । सबैले आफ्नो शैली, रणनीति र मानसिक बलको परीक्षा उत्तीर्ण गर्दै यहाँसम्मको यात्रा तय गरेका छन् ।
साविक विजेता अर्जेन्टिना फेरि एकपटक विश्व फुटबलको शिखरतर्फ अघि बढिरहेको छ । लियोनल स्कालोनीको टोलीमा अब व्यक्तिगत प्रतिभाभन्दा टोलीगत सन्तुलन बढी देखिन्छ । कप्तान लियोनल मेसी अझै पनि निर्णायक क्षणका नायक हुन् ।
मध्यपंक्तिको नियन्त्रण, बल पोसेसनमा धैर्यता र अवसरलाई गोलमा परिणत गर्ने क्षमताले अर्जेन्टिनालाई प्रतियोगिताको सबैभन्दा परिपक्व टोली बनाएको छ । कठिन नकआउट खेलमा अतिरिक्त समयसम्म धैर्य कायम राख्ने मानसिकता पनि टोलीको सबैभन्दा ठूलो बलका रूपमा देखिएको छ । लगातार दोस्रो विश्वकप जित्ने सम्भावनासँगै अर्जेन्टिना सेमिफाइनलमा प्रवेश गरेको छ ।
उता स्पेनले भने विश्वकपभर आधुनिक फुटबलको उत्कृष्ट प्रदर्शन प्रस्तुत गरेको छ । तीव्र गतिमा पास आदानप्रदान, बलमाथिको नियन्त्रण र आक्रामक शैलीले स्पेनलाई प्रतियोगिताकै सबैभन्दा आकर्षक टोलीमध्ये एक बनाएको छ ।
लुइस डे ला फुएन्तेको नेतृत्वमा युवा र अनुभवी खेलाडीहरूको संयोजनले सन्तुलित टोली निर्माण भएको छ । विशेषगरी लामिन यमलजस्ता नयाँ पुस्ताका खेलाडीहरूले स्पेनको आक्रमणलाई नयाँ आयाम दिएका छन् । रक्षापंक्तिको अनुशासन र निरन्तर दबाब सिर्जना गर्ने शैलीले स्पेनलाई उपाधिको प्रमुख दाबेदार बनाएको छ ।
फ्रान्सको यात्रा पनि उत्तिकै प्रभावशाली रह्यो । डिडियर डेसच्याम्प्सको टोलीले कुनै अनावश्यक जोखिम नलिई परिणाममुखी फुटबल खेलिरहेको छ । आक्रमणमा किलियन एम्बाप्पेको तीव्र गति र व्यक्तिगत कौशल विपक्षीका लागि सबैभन्दा ठूलो चुनौती बनेको छ भने रक्षापंक्तिले निकै कम गल्ती गरेको छ ।
फ्रान्सको सबैभन्दा ठूलो विशेषता भनेको अवसरको अधिकतम उपयोग र दबाबका बेला संयम कायम राख्ने क्षमता हो । यही कारण टोली सहज रूपमा अन्तिम चारमा पुगेको छ ।
इङ्ल्यान्डको कथा भने अन्य तीन टोलीभन्दा फरक छ । धेरै खेलमा दबाब झेलेर, अतिरिक्त समय पार गर्दै र संघर्षपूर्ण जित निकाल्दै टोली सेमिफाइनलसम्म आइपुगेको हो । प्रशिक्षक थोमस टुचेलको रणनीतिमा कप्तान हेरी केनको अनुभव र जुड बेलिंघमको ऊर्जा निर्णायक बनेको छ ।
सन् १९६६ पछि विश्वकप जित्न नसकेको इङ्ल्यान्डका लागि यो प्रतियोगिता लामो प्रतीक्षाको अन्त्य गर्ने अवसर पनि हो । कठिन परिस्थितिमा पनि आत्मविश्वास कायम राख्ने टोलीको क्षमता नै उसको सबैभन्दा ठूलो हतियार बनेको छ ।
सेमिफाइनल : जहाँ इतिहास र भविष्य आमनेसामने
पहिलो सेमिफाइनलमा स्पेन र फ्रान्स भिड्नेछन् । एउटा टोली युवा प्रतिभा र आकर्षक आक्रमणमा विश्वास गर्छ भने अर्को टोली अनुभव, गति र प्रभावकारी काउन्टर अट्याकमा ।
दोस्रो सेमिफाइनल अझ बढी भावनात्मक हुनेछ । अर्जेन्टिना र इङ्ल्यान्डबीचको प्रतिस्पर्धामा एकातिर मेसीको सम्भावित अन्तिम विश्वकप यात्रालाई स्वर्णिम बनाउने सपना हुनेछ भने अर्कोतर्फ इङ्ल्यान्ड ६ दशक लामो विश्वकपको प्रतीक्षा अन्त्य गर्ने अभियानमा हुनेछ ।
अब गल्तीको कुनै ठाउँ छैन
विश्वकप अब यस्तो चरणमा पुगेको छ जहाँ एउटा उत्कृष्ट क्षणले खेल जिताउन सक्छ भने एउटा सामान्य गल्तीले चार वर्षको सपना समाप्त गर्न सक्छ । त्यसैले अब कौशल मात्र होइन, मानसिक शक्ति, रणनीतिक लचकता र दबाब झेल्ने क्षमताले पनि उपाधिको निर्णय गर्नेछ ।
अन्तिम चारमा रहेका चारै टोली यसअघि विश्वकप जितिसकेका स्थापित शक्ति हुन् । फ्रान्स तेस्रो, स्पेन र इङ्ल्यान्ड दोस्रो तथा अर्जेन्टिना चौथो विश्वकप उपाधिको खोजीमा छन् ।
दोलखा । जिल्लाको कालिञ्चोक गाउँपालिका–१ क्याम्पोलमा पहिरोमा परेर एक जना नाबालिकाको मृत्यु भएको छ भने उनकी आमा गम्भीर घाइते भएकी छन् ।
प्रहरीका अनुसार आइतबार राति ९ बजे क्याम्पोल हेलेकपाथलीमा माइतबाट घर फर्कने क्रममा सडकमाथिबाट अचानक पहिरो खसेको थियो । पहिरोमा पुरिएर ४ महिनाकी नाबालिका एलिसा थामीको ज्यान गएको हो ।
घटनालगत्तै स्थानीय बासिन्दाले राति नै पहिरोमा परेका आमा–छोरीको उद्धार गरी दोलखा धुलिखेल अस्पताल पुर्याएका थिए । तर, अस्पताल ल्याउने क्रममा नाबालिका एलिसाको बाटोमै मृत्यु भइसकेको प्रहरीले जनाएको छ । पहिरोमा परेर गम्भीर घाइते भएकी १९ वर्षीया आमा शर्मिला थामीलाई प्राथमिक उपचारपछि थप उपचारका लागि काठमाडौं रिफर गरिएको छ ।
कास्की । जिल्लाको अन्नपूर्ण गाउँपालिका–११ अन्तर्गत पर्ने किम्रुङ खोलामा शुक्रबार आएको आकस्मिक बाढीले मोदी खोलाको जलस्तर ह्वात्तै बढेपछि नदी किनारका घर तथा पूर्वाधारमा ठूलो क्षति पुगेको छ ।
बाढीले अन्नपूर्ण गाउँपालिका–८ र १० को सीमास्थित स्याउलीबजारमा दिलीप गुरुङको घर र होटल पूर्ण रूपमा बगाएको छ भने स्थानीय जगन पुनको रेष्टुरेन्टमा समेत क्षति पुगेको गाउँपालिकाका अध्यक्ष विष्णुबहादुर केसीले जानकारी दिए ।
बाढीका कारण मोदी खोलाको कटान तीव्र बनेपछि पर्यटकीय गन्तव्य घान्द्रुक जोड्ने नयाँपुल–घान्द्रुक सडक पूर्ण रूपमा अवरुद्ध भएको छ । साथै किम्रुङ खोलामाथिको झोलुङ्गे पुल पनि बगाएकाले स्थानीय बासिन्दा र स्वदेशी तथा विदेशी पर्यटकको आवतजावत ठप्प भएको छ ।
अध्यक्ष केसीका अनुसार किम्रुङ खोलामा लेदोसहित आएको बाढी मोदी खोलामा मिसिएपछि पानीको बहाव एक्कासि बढ्दा उक्त क्षति भएको हो । ‘अचानक आएको बाढीले एउटा घर पूर्ण रूपमा बगाएको छ भने एउटा रेष्टुरेन्टमा क्षति पुगेको छ, घान्द्रुक जाने सडकसमेत बाढीले बगाएको छ,’ उनले भने ।
स्थानीयवासीका अनुसार नदीको माथिल्लो क्षेत्रमा पहिरो खसेर नदी थुनिएपछि एक्कासि बाँध फुटेजस्तै गरी पानी बगेकाले बाढी आएको हुन सक्ने अनुमान गरिएको छ ।
घटनापछि स्थानीय प्रशासन र गाउँपालिकाले नदी तटीय क्षेत्रमा बसोबास गर्ने नागरिकलाई सुरक्षित स्थानमा सार्न थालेका छन् । प्रशासनले मोदी खोला आसपासका बासिन्दालाई उच्च सतर्कता अपनाउन, नदी किनारमा नजान तथा आवश्यक परे तत्काल सुरक्षित स्थानमा जान आग्रह गरेको छ ।
बाढी प्रभावित क्षेत्रमा गाउँपालिका अध्यक्ष विष्णुबहादुर केसी, वडा नं. ११ का अध्यक्ष हिमबहादुर गुरुङ, नेपाल प्रहरी, सशस्त्र प्रहरी बल तथा अन्नपूर्ण संरक्षण क्षेत्र आयोजना (एक्याप) को टोली परिचालन गरिएको छ । टोलीले घटनास्थलमा पुगेर क्षतिको विवरण संकलन गर्नुका साथै आवश्यक उद्धार तथा व्यवस्थापनको काम अघि बढाइरहेको सहायक प्रमुख जिल्ला अधिकारी चित्राङ्गत बरालले जानकारी दिए ।
काठमाडौं । नेपाली भाषा र साहित्यका आदिकवि भानुभक्त आचार्यको २१३औँ जन्मजयन्ती आज देश तथा विदेशका विभिन्न स्थानमा विविध कार्यक्रम गरी मनाइँदैछ । भाषा, साहित्य र संस्कृतिको संरक्षण तथा प्रवद्र्धनमा उनको योगदानको सम्मानस्वरूप माल्यार्पण, प्रभातफेरी, रामायण वाचन तथा साहित्यिक कार्यक्रम आयोजना गरिएका छन् ।
संस्कृत भाषामा रचित रामायणलाई सरल नेपाली भाषामा भावानुवाद गरी जनसाधारणसम्म पुर्याउने भानुभक्तको योगदान नेपाली साहित्यको इतिहासमा अत्यन्त महत्वपूर्ण मानिन्छ । उनले अनुवाद गरेको रामायण अहिले पनि नेपाली समाजमा श्रद्धापूर्वक पाठ गरिने परम्परा कायम छ ।
इतिहासकार तथा साहित्यकारहरूले पृथ्वीनारायण शाहले भौगोलिक रूपमा एकीकृत गरेको नेपाललाई भानुभक्तले भाषा, साहित्य र संस्कृतिको माध्यमबाट भावनात्मक रूपमा जोड्ने काम गरेको उल्लेख गर्दै आएका छन् ।
विसं १८७१ असार २९ गते तनहुँको चुँदीरम्घामा जन्मिएका भानुभक्त सामान्य घाँसीसँग भएको भेटपछि प्रेरित भई नेपाली भाषामा रामायण लेख्न अग्रसर भएको किंवदन्ती प्रचलित छ । समाजका लागि सम्झनलायक काम गर्नुपर्छ भन्ने सन्देशबाट प्रभावित भएर उनले साहित्य सिर्जनामा समर्पित जीवन बिताएका थिए ।
रामायणबाहेक ‘वधुशिक्षा’, ‘प्रश्नोत्तर’, ‘भक्तमाला’, ‘रामगीता’ लगायतका कृतिमार्फत पनि उनले नेपाली साहित्यलाई समृद्ध बनाएका छन् । राष्ट्रिय पहिचान, सांस्कृतिक चेतना र नेपाली भाषाको विकासमा उनको योगदान ऐतिहासिक मानिन्छ ।
भानु जयन्तीका अवसरमा नेपाल प्रज्ञा प्रतिष्ठान परिसरमा रहेको आदिकविको प्रतिमामा माल्यार्पणसहित विशेष कार्यक्रम आयोजना गरिएको छ । साथै, भानु प्रतिष्ठान, नेपाली शिक्षा परिषद् तथा अन्य साहित्यिक एवं सांस्कृतिक संस्थाहरूले पनि देशभर विभिन्न कार्यक्रम सञ्चालन गरिरहेका छन् ।
नेपालसँगै भारतका दार्जिलिङ, सिक्किम, भुटान, म्यानमार (बर्मा) लगायत नेपाली भाषी समुदाय बसोबास गर्ने विभिन्न देश र स्थानमा पनि भानुभक्तको जन्मजयन्ती विशेष रूपमा मनाउने परम्परा रहँदै आएको छ ।
काठमाडौं । देशभर हाल मनसुनी वायुको प्रभाव कायम छ । मनसुनको न्यून चापीय रेखा अहिले सरदर स्थानभन्दा केही माथि नेपालको तराई भू–भाग नजिक सरेको जल तथा मौसम पूर्वानुमान महाशाखाले जनाएको छ । यसका कारण मुलुकभरको मौसममा बदली आएको छ ।
अहिले देशभर अधिकांश क्षेत्रमा बादल लागेको अवस्था छ । कोशी, बागमती, गण्डकी, लुम्बिनी र कर्णाली प्रदेशका केही स्थानमा अहिले हल्कादेखि मध्यम वर्षा भइरहेको छ । यस्तै मधेस र सुदूरपश्चिम प्रदेशका एक–दुई स्थानमा पनि पानी परिरहेको महाशाखाले जनाएको छ ।
महाशाखाका अनुसार सोमबार कोशी, मधेस, बागमती, गण्डकी र लुम्बिनी प्रदेशमा अधिकांश बादल लाग्ने देखिएको छ । कर्णाली र सुदूरपश्चिम प्रदेशमा भने साधारणतया बादल लाग्ने अनुमान गरिएको छ। वर्षा र हिमपातको कुरा गर्दा कोशी, बागमती र गण्डकी प्रदेशका हिमाली भू–भागका धेरै ठाउँमा मेघगर्जन र चट्याङसहित मध्यमसम्मको वर्षा तथा हिमपातको सम्भावना छ । लुम्बिनी, कर्णाली र सुदूरपश्चिम प्रदेशका हिमाली भू–भागका थोरै स्थानमा पनि यस्तै मौसमी प्रणाली देखिने छ ।
यसैगरी कोशी, बागमती र गण्डकी प्रदेशका पहाडी र तराई भू–भागका धेरै स्थानमा चट्याङ्गसहित मध्यम वर्षाको सम्भावना छ । मधेस प्रदेश, लुम्बिनी र सुदूरपश्चिम प्रदेशका पहाडी तथा तराई क्षेत्र र कर्णाली प्रदेशको पहाडी भू–भागका केही स्थानमा पनि मेघगर्जनसहित मध्यमसम्मको वर्षा हुन सक्ने महाशाखाले उल्लेख गरेको छ ।
महाशाखाका अनुसार कोशी, बागमती र गण्डकी प्रदेशको पहाडी भू–भागको थोरै स्थानमा भारी वर्षाको सम्भावना छ । त्यस्तै मधेस प्रदेश लगायत कोशी, बागमती र गण्डकी प्रदेशको तराई भू–भागका एक–दुई स्थानमा पनि भारी वर्षा हुन सक्ने भएकाले आवश्यक सतर्कता अपनाउन मौसमविद्ले आग्रह गरेका छन् ।
