काठमाडौं । लगातार चार कारोबार दिन ओरालो लागेको सेयर बजारले शुक्रबार सामान्य सुधार देखाएको छ। साताको अन्तिम कारोबार दिन नेप्से परिसूचक १.५४ अंकले बढ्दै २७८८ अंकमा पुगेको हो। यसअघि बजार लगातार गिरावटमा रहेको थियो।
कारोबार रकममा पनि सामान्य वृद्धि देखिएको छ। अघिल्लो दिन ५ अर्ब ९ करोड रुपैयाँ बराबरको सेयर कारोबार भएकोमा शुक्रबार ५ अर्ब २७ करोड रुपैयाँ पुगेको छ।
आजको कारोबारमा ८७ कम्पनीको शेयर मूल्य बढ्दा १६८ कम्पनीको घटेको छ भने १४ कम्पनीको मूल्य स्थिर रहेको छ। क्षेत्रगत रूपमा बैंकिङ, विकास बैंक, होटल तथा पर्यटन, हाइड्रोपावर, उत्पादन तथा प्रशोधन तथा व्यापार समूहमा सामान्य वृद्धि देखिएको छ।
यता, अन्य समूहमा सबैभन्दा धेरै गिरावट आएको छ। निर्जीवन बीमा, माइक्रोफाइनान्स, जीवन बीमा, लगानी तथा फाइनान्स समूह पनि घटेका छन्।
कारोबारका क्रममा तीन कम्पनीको शेयर मूल्य १५ प्रतिशतले वृद्धि भएको छ। ती कम्पनीहरूमा पाल्पा सिमेन्ट इन्डस्ट्रिज, शिखर पावर र माइखोला हाइड्रोपावर छन् । त्यस्तै कर्पोरेट डेभलपमेन्ट बैंकको १२.६२ तथा श्रीनगर एग्रिटेकको ४.९१ प्रतिशत मूल्य बढ्यो ।
मेन्छियाम हाइड्रोपावरको मूल्य सबैभन्दा धेरै ३.५० प्रतिशत घट्यो । आज धेरै कारोबार भएका कम्पनीमा रिडी पावर, रिलायन्स स्पिनिङ मिल्स, नेसनल हाइड्रोपावर, सोलु हाइड्रोपावर र आँखुखोला जलविद्युत् कम्पनी छन् ।
काठमाडौं । टक्सार पिखुवा खोला हाइड्रोपावर लिमिटेडले सर्वसाधारणका लागि आईपीओ निष्काशन गर्ने तयारी गरेको छ । कम्पनीले आगामी वैशाख २३ गतेदेखि सर्वसाधारण लगानीकर्ताका लागि शेयर बिक्री खुला गर्ने जनाएको हो । यसअघि आयोजना प्रभावित स्थानीय बासिन्दा तथा वैदेशिक रोजगारीमा रहेका नेपालीहरूका लागि छुट्याइएको आईपीओ बाँडफाँट सम्पन्न भइसकेको छ ।
कम्पनीले जारी पूँजी १ अर्ब २० करोड रुपैयाँको ३५ दशमलव २६ प्रतिशत बराबरको ४२ लाख ३० हजार ६६८ कित्ता शेयर निष्काशन गर्न अनुमति प्राप्त गरेको थियो । यसमध्ये १२ लाख कित्ता शेयर आयोजना प्रभावित क्षेत्रका स्थानीय बासिन्दालाई र ३ लाख ३ हजार ६७ कित्ता शेयर विदेशमा श्रम स्वीकृति लिएर कार्यरत नेपालीहरूलाई वितरण गरिसकिएको छ ।
त्यसैगरी, सामूहिक लगानी कोषका लागि १ लाख ५१ हजार ५३३ कित्ता तथा कम्पनीका कर्मचारीका लागि ६० हजार ६१३ कित्ता शेयर छुट्याएर बाँडफाँट गरिएको कम्पनीले जनाएको छ ।
अब कम्पनीले सर्वसाधारणका लागि प्रतिकित्ता १०० रुपैयाँ अंकित मूल्यमा २५ लाख १५ हजार ४५५ कित्ता शेयर बिक्री खुला गर्न लागेको हो । उक्त आईपीओमा न्यूनतम १० कित्तादेखि आवेदन दिन सकिनेछ भने अधिकतम ५० हजार कित्तासम्म आवेदन दिन पाइनेछ ।
आईपीओ बिक्री छिटोमा वैशाख २८ गतेसम्म खुला रहनेछ । आवश्यक आवेदन नपरेमा बिक्री अवधि जेठ ६ गतेसम्म लम्बिन सक्नेछ ।
