काठमाडौं । आगामी आर्थिक वर्ष २०८३/८४ को बजेट निर्माणलाई व्यवस्थित र प्रभावकारी बनाउन अर्थ मन्त्रालयले बजेट लेखन समिति गठन गरेको छ ।
अर्थमन्त्री स्वर्णिम वाग्लेले जेठ १५ गते संसदमा प्रस्तुत गर्ने बजेटको तयारीस्वरूप गठन गरिएको उक्त समितिको संयोजकका रूपमा राजस्व व्यवस्थापन महाशाखा प्रमुख तथा सहसचिव उत्तर खत्रीलाई जिम्मेवारी दिइएको छो ।
समितिले आगामी वर्षका लागि वार्षिक नीति तथा कार्यक्रमको मस्यौदा तयार पार्ने, आयोजना तथा कार्यक्रमहरूको प्राथमिकता निर्धारणमा सहजीकरण गर्ने तथा संसदमा प्रस्तुत गरिने विनियोजन विधेयकको तयारी गर्नेछ । साथै, सम्पूर्ण बजेट मस्यौदा तयार गरी पेश गर्ने दायित्व पनि यही समितिले वहन गर्नेछ ।
समितिमा अर्थ मन्त्रालयअन्तर्गत विभिन्न महाशाखाका प्रमुखहरू सदस्यका रूपमा सहभागी छन् । सदस्यहरूमा सहसचिवहरू सुमन दाहाल, धानिराम शर्मा, महेश भट्टाराई र शिवनन्द पोखरेल रहेका छन् ।
उता, राष्ट्रिय योजना आयोगले आगामी आर्थिक वर्षका लागि १८ खर्ब ९० अर्ब रुपैयाँको बजेट सिलिङ निर्धारण गरिसकेको छ, जसका आधारमा बजेट निर्माण प्रक्रिया अघि बढाइनेछ ।
काठमाडौं । नेपाली बजारमा आज सुनको मूल्य यथावत् रहँदा चाँदीको मूल्यमा सामान्य वृद्धि देखिएको छ ।
नेपाल सुनचाँदी व्यवसायी महासंघका अनुसार चैत २० गते सुनको मूल्यमा स्थिर छ । जिहोकै मूल्यमा आज पनि प्रतितोला २ लाख ९४ हजार रुपैयाँमै कारोबार भइरहेको छ । अघिल्लो दिन पनि यही मूल्यमा सुन किनबेच भएको थियो ।
यसैबीच, चाँदीको मूल्य भने आज केही बढेको छ । चाँदी प्रतितोला ५० रुपैयाँले बढेर ४ हजार ८ सय २० रुपैयाँ पुगेको छ । हिजो चाँदी ४ हजार ७ सय ८० रुपैयाँमा कारोबार भएको थियो ।
काठमाडौं । नेकपा (एमाले)का संसदीय दलका नेता रामबहादुर थापाले प्रतिनिधि सभामा व्यक्त गरेको धारणा पार्टीभित्र विवादको विषय बनेको छ । उनको अभिव्यक्तिलाई लिएर शीर्ष तहका नेताहरूले नै असहमति जनाएपछि एमालेभित्र राजनीतिक तरंग पैदा भएको हो ।
पार्टीका नेताहरूले थापाको भनाइ एमालेको स्थापित नीति, सिद्धान्त तथा ‘जनताको बहुदलीय जनवाद’को मर्मसँग मेल नखाने टिप्पणी गरेका छन् । उपाध्यक्ष विष्णु पौडेलले सामाजिक सञ्जालमार्फत प्रतिक्रिया दिँदै थापाको अभिव्यक्ति पार्टीको आधिकारिक धारणा विपरीत रहेको उल्लेख गरे । उनले यस विषयमा केन्द्रीय सचिवालय बैठकमा गम्भीर छलफल हुने र आवश्यक निर्णय लिइने बताए ।
यस्तै, उपमहासचिव योगेश भट्टराईले पनि पार्टीको मार्गदर्शक सिद्धान्त ‘जनताको बहुदलीय जनवाद’को व्याख्या गर्दै थापाको विचारप्रति असहमति जनाए । उनले एमाले प्रतिस्पर्धाबाट अघि बढ्ने, शान्तिपूर्ण र वैधानिक माध्यमबाट समाज रूपान्तरण गर्ने तथा जनमतको सम्मान गर्ने पार्टी भएको स्पष्ट पारे ।
भट्टराईका अनुसार जनमतको कदर गर्दै पराजयको समीक्षा गरी पुनः जनविश्वास जित्ने प्रक्रिया नै जबजको मूल मर्म हो । उनले राज्यका प्रमुख अंगहरू—सेना, प्रहरी, न्यायालय तथा कर्मचारीतन्त्रप्रति एमालेको सधैँ सम्मान रहने पनि बताए ।
यसअघि थापाले आफ्नो सम्बोधनमा विभिन्न संस्थाहरूको भूमिकाका कारण राष्ट्रिय स्वतन्त्र पार्टीले उल्लेखनीय सफलता हासिल गरेको दाबी गरेका थिए ।
यसैबीच, विवादित अभिव्यक्तिपछि एमालेले आकस्मिक रूपमा सचिवालय बैठक आह्वान गरेको छ । उपाध्यक्ष गोकर्ण विष्टका अनुसार बैठक शुक्रबार दिउँसो १ बजे पार्टी कार्यालयमा बस्नेछ । नेताहरूका अनुसार थापाको उक्त अभिव्यक्तिबारे यसअघि पार्टीभित्र औपचारिक छलफल भएको थिएन ।
काठमाडौं । पेट्रोलियम पदार्थको मूल्य पुनः बढाइएको छ । नेपाल आयल निगमका अनुसार पेट्रोल, डिजेल र मट्टीतेलमा समान रूपमा प्रतिलिटर १५ रुपैयाँले मूल्य वृद्धि गरिएको हो ।
निगम सञ्चालक समितिको चैत १९ गते बसेको बैठकले गरेको निर्णयअनुसार नयाँ मूल्य आज राति १२ बजेपछि लागू हुने जनाइएको छ । अन्तर्राष्ट्रिय बजारमा इन्धनको मूल्य निरन्तर उकालो लागिरहेका कारण मूल्य समायोजन गर्नुपरेको निगमको भनाइ छ ।
नयाँ दर अनुसार अब काठमाडौँ उपत्यकामा पेट्रोलको मूल्य प्रतिलिटर २०२ रुपैयाँ पुगेको छ भने डिजेल र मट्टीतेलको मूल्य १७२ रुपैयाँ कायम भएको छ ।
निगमले मध्यपूर्वमा जारी द्वन्द्वका कारण अन्तर्राष्ट्रिय बजारमा इन्धनको मूल्य बढ्दै जाँदा आफूले ठूलो आर्थिक भार व्यहोर्नुपरेको उल्लेख गरेको छ । निगमका अनुसार हाल पाक्षिक रूपमा करिब १३ अर्ब २१ करोड रुपैयाँ बराबरको घाटा भइरहेको छ ।
