काठमाडौं । नेपाली कांग्रेसले आफ्नो १५औँ महाधिवेशन आगामी भदौ महिनामा आयोजना गर्ने तयारी गरेको छ ।
केन्द्रीय समिति बैठकमा सभापति गगन थापाले भदौ २४ देखि २६ गतेसम्म काठमाडौंमा महाधिवेशन गर्ने प्रस्ताव पेश गरेका हुन् । उनले प्रस्तावसँगै विस्तृत कार्यतालिका पनि प्रस्तुत गरेका छन् ।
उक्त प्रस्तावमाथि बैठकमा छलफल जारी रहेको र छलफलपछि अन्तिम निर्णय लिइने बताइएको छ ।
यसअघि विशेष महाधिवेशनबाट आएको नेतृत्वले अब नियमित महाधिवेशन आयोजना गर्न लागेको हो ।
काठमाडौं । मंगलबार शेयर बजारमा सुधार देखिएको छ । नेपाल स्टक एक्सचेन्ज (नेप्से) परिसूचक २३ दशमलव ८३ अंकले बढ्दै २ हजार ९६० दशमलव ४ बिन्दुमा पुगेको हो ।
आज ३ करोड ५८ लाख २२ हजार १९१ कित्ता शेयर किनबेच हुँदा १४ अर्ब ८३ करोड ९१ लाख रुपैयाँ बराबरको कारोबार भएको छ । अघिल्लो दिन सोमबारको तुलनामा कारोबार रकम केही घटेको हो, सो दिन १५ अर्ब ७८ करोड ६३ लाख रुपैयाँको शेयर कारोबार भएको थियो ।
कारोबार भएका ३४२ धितोपत्रमध्ये १३६ कम्पनीको शयर मूल्य बढेको छ भने ११७ कम्पनीको घटेको छ । यस्तै ११ कम्पनीको मूल्य स्थिर रहेको छ ।
उपसूचकतर्फ अधिकांश समूह हरियो देखिएका छन् । व्यापार समूह ९ दशमलव १२ प्रतिशतले सबैभन्दा धेरै बढ्दा विकास बैंक विकास बैंक १ दशमलव ३८, हाइड्रोपावर १ दशमलव ३२, उत्पादन तथा प्रशोधन शून्य दशमलव ८६, बैंकिङ शून्य दशमलव ६७, फाइनान्स शून्य दशमलव ५१, म्युचुअल फण्ड शून्य दशमलव २५ र लगानी समूहको उपसूचक शून्य दशमलव ११ प्रतिशतले बढेको छ ।
यस्तै माइक्रोफाइनान्स शून्य दशमलव ४६, निर्जीवन बीमा शून्य दशमलव ३८, जीवन बीमा शून्य दशमलव ३७, होटेल तथा पर्यटन शून्य दशमलव १७ र अन्य समूहको उपसूचक शून्य दशमलव १६ प्रतिशतले घटेको छ ।
आज ३ कम्पनीको शेयर मूल्यमा सकारात्मक सर्किट लागेको छ । सर्किट लाग्नेमा साल्पा विकास बैंक, सोलु हाइड्रोपावर र रिलाइन्स स्पीनिङ मिल्स रहेका छन् । यस्तै हिमालयन पावर पार्टनर ९ दशमलव ९८ र भुजुङ्ग हाइड्रोपावरको शेयर मूल्य ९ दशमलव ९८ प्रतिशतले बढेको छ ।
यसदिन फस्ट माइक्रो फाइनान्स लघुवित्त ६ दशमलव ५६, मनकामना इन्जिनियरिङ हाइड्रोपावर ५ दशमलव ११, मेरो माइक्रोफाइनान्स ४ दशमलव ५३ र नारायणी डेभलपमेन्ट विकास बैंकको शेयर मूल्य ३ दशमलव ८१ प्रतिशतले ह्रास आएको छ ।
काठमाडौं । सरकारले गत भदौ २३–२४ मा भएको जेनजी युवाहरूको आन्दोलनको घटनाबारे बनाइएको जाँचबुझ प्रतिवेदन सार्वजनिक गर्न तयारी गरेको छ । प्रतिवेदन लामो समय गोप्य राखिएको भन्दै सर्वत्र प्रश्न उठिरहेका बेला सरकार यसलाई सार्वजनिक गर्न लागेको हो ।
उच्च सरकारी स्रोतका अनुसार प्रधानमन्त्री सुशीला कार्की प्रतिवेदन सार्वजनिक गर्नुअघि सरकारका केही वरिष्ठ मन्त्रीहरूसँग आन्तरिक छलफलमा छन् । यही छलफलले प्रतिवेदन कहिले सार्वजनिक गर्ने भन्ने मिति तय गर्नेछ ।
सरकारका एक उच्च अधिकारीका अनुसार प्रतिवेदन ‘आज–भोलि’ सार्वजनिक हुनसक्ने सम्भावना छ । तर प्रधानमन्त्री कार्कीका प्रेस सल्लाहकार रामबहादुर रावलले भने प्रतिवेदन सार्वजनिक हुनेबारे आफूलाई कुनै जानकारी नभएको बताए ।
गत फागुन २४ गते गौरीबहादुर कार्की नेतृत्वको आयोगले प्रतिवेदन सरकारलाई बुझाएको थियो । आयोगका सदस्य एवं प्रवक्ता विज्ञानराज शर्माले सो प्रतिवेदनले विगतका मल्लिक र रायमाझी आयोगको नियति दोहोर्याउने नहुने बताएका थिए ।
चैत १ गते बसेको मन्त्रिपरिषद् बैठकले प्रतिवेदन ग्रहण गर्ने निर्णय गरेको थियो । बैठकपछि गृहमन्त्री ओमप्रकाश अर्यालले पत्रकारहरूसँग भनेका थिए, “प्रतिवेदन भोलि आउँछ,” तर अहिलेसम्म सार्वजनिक भएको छैन ।
जेनजी आन्दोलनका अगुवा र जवाफदेही निगरानी समूहले प्रतिवेदन सार्वजनिक गर्न सरकारमा लगातार दबाब दिँदै आएका छन् । युवाहरूले दिनहुँ माइतीघर मण्डलामा प्रदर्शन गर्दै प्रतिवेदन सार्वजनिक गर्न माग गर्दै आएका छन् । चैत ८ गते नेपाली कांग्रेस केन्द्रीय समितिले पनि प्रतिवेदन सार्वजनिक गर्न सरकारलाई आग्रह गर्ने निर्णय गरेको थियो ।
अन्तरिम सरकारले चुनावको जिम्मेवारी पूरा गरेपछि नयाँ सरकार गठन अघि नै प्रतिवेदन सार्वजनिक गर्ने तयारी गरेको स्रोतले जनाएको छ ।
प्रतिवेदनमा के छ ?
कार्की आयोगले अनुसन्धानको क्रममा तत्कालीन प्रधानमन्त्री केपी शर्मा ओली, तत्कालीन गृहमन्त्री रमेश लेखक र तत्कालीन प्रहरी प्रमुख चन्द्रकुवेर खापुङलाई फौजदारी कसुरमा मुद्दा चलाउन सिफारिस गरेको छ । उनीहरूमाथि १०–१० वर्षको कैद सिफारिस गरिएको छ ।
सशस्त्र प्रहरीका आईजी राजु अर्याललाई तीन वर्षको कैद सिफारिस गरिएको छ । तत्कालीन गृहसचिव गोकर्णमणी दुवाडी, काठमाडौंका तत्कालीन प्रमुख जिल्ला अधिकारी छवि रिजाल र नेपाल प्रहरीका सिद्धिविक्रम शाहीमाथि पनि कारबाही सिफारिस गरिएको छ ।
सशस्त्र प्रहरी र राष्ट्रिय अनुसन्धान विभागका केही पदाधिकारीहरूलाई पनि विभागीय कारबाहीको सिफारिस गरिएको छ ।
उच्च अधिकारीहरूका अनुसार आयोग गठन नै विवादास्पद रहँदा यसको सिफारिस पनि पूर्ण दोषमुक्त हुन सक्दैन । तर प्रतिवेदन सार्वजनिक हुनु सकारात्मक कदम हुने विश्वास व्यक्त गरिएको छ ।
त्यसैगरी, राष्ट्रिय मानव अधिकार आयोगले गठन गरेको छुट्टै छानबिन समितिले पनि तत्कालीन प्रधानमन्त्री ओली, गृहमन्त्री लेखक, प्रधानसेनापति अशोकराज सिग्देल लगायतका राष्ट्रिय सुरक्षा परिषद्का सबै पदाधिकारीलाई कारबाही सिफारिससहित प्रतिवेदन तयार पारेको छ । अनलाइनखबरबाट सम्पादित
रुपन्देही । रुपन्देहीको शुद्धोधन गाउँपालिका–१, सिसइचोकमा ६० वर्षीया रेनु पटवाको हत्या प्रकरणमा संलग्न रहेको आरोपमा प्रहरीले एक १५ वर्षीय किशोरलाई नियन्त्रणमा लिएको छ । पक्राउ परेका किशोर मृतककै छिमेकी रहेको जनाइएको छ ।
इलाका प्रहरी कार्यालय बुटवलका प्रहरी नायब उपरीक्षक निशान्त श्रीवास्तवका अनुसार चैत २ गते राति आफ्नै पसलमा सुतिरहेकी पटवामाथि धारिलो हतियार (कैची) प्रहार गरी हत्या गरिएको थियो । प्रारम्भिक अनुसन्धानमा किशोरले लागुऔषध किन्न पैसाको अभाव भएपछि चोरी गर्ने उद्देश्यले पसलमा प्रवेश गरेको र सो क्रममा विवाद हुँदा हत्या गरिएको स्वीकार गरेको प्रहरीले जनाएको छ ।
प्रहरीका अनुसार घटनाका क्रममा किशोरले मृतकको टाउको, अनुहार र घाँटीमा अन्धाधुन्ध कैची प्रहार गरेका थिए । घटना लगत्तै फरार रहेका उनलाई प्रहरीले गत शनिबार पक्राउ गरेको हो ।
हाल जिल्ला अदालत रुपन्देहीबाट म्याद थप गरी कर्तव्य ज्यान मुद्दामा विस्तृत अनुसन्धान जारी रहेको प्रहरीले जानकारी दिएको छ ।
काठमाडौं । नेपाली बजारमा सुनको मूल्यमा निरन्तर गिरावट देखिएको छ।
नेपाल सुनचाँदी व्यवसायी महासंघका अनुसार मंगलबार (चैत १०) सुनको मूल्य प्रतितोला १६ सय रुपैयाँले घट्दै दुई लाख ७३ हजार ९०० रुपैयाँमा कायम भएको छ।
यसअघि सोमबार (चैत ९) सुन प्रतितोला दुई लाख ७५ हजार ५०० रुपैयाँमा कारोबार भएको थियो।
उता, चाँदीको मूल्य भने वृद्धि भएको छ। चाँदी प्रतितोला ८० रुपैयाँले बढेर चार हजार ५०५ रुपैयाँ पुगेको छ। अघिल्लो दिन चाँदीको मूल्य चार हजार ४२५ रुपैयाँ रहेको थियो।
काठमाडौं । नेपाली कांग्रेसको केन्द्रीय कार्यसमितिको बैठक आज बस्दैछ । पार्टी केन्द्रीय कार्यालय सानेपामा दिउँसो १ बजे बैठक बोलाइएको कार्यबाहक मुख्य सचिव कृष्ण प्रसाद दुलालले जानकारी दिए ।
बैठकमा केन्द्रीय कार्यसमितिका पदाधिकारी, सदस्यहरू तथा प्रदेश सभापतिहरूको सहभागिता रहनेछ । सभापति गगन थापा स्वयंको सभापतित्वमा बैठक सञ्चालन हुने जनाइएको छ ।
यसअघि थापाले दिएको राजीनामा केन्द्रीय समितिको पछिल्ला बैठकहरूले अस्वीकार गरिसकेको छ ।
आजको बैठकमा समय अभावका कारण वैशाखमा गर्ने भनिएको नियमित महाधिवेशन असोजमा सार्ने तयारीबारे मुख्य रूपमा छलफल हुने बताइएको छ ।
काठमाडौं । कालंगा हाइड्रो लिमिटेडले आज चैत १० गतेदेखि प्रारम्भिक सार्वजनिक निष्काशन (आईपीओ) बिक्री खुला गरेको छ । कम्पनीले आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीलाई लक्षित गर्दै शेयर निष्काशन प्रक्रिया अघि बढाएको हो ।
कम्पनीले जारी पूँजी १ अर्ब ४० करोड रुपैयाँको ३५ प्रतिशत बराबर ४९ लाख कित्ता शेयर बिक्रीका लागि अनुमति पाएको थियो । यसमध्ये १४ लाख कित्ता (१४ करोड रुपैयाँ बराबर) शेयर आयोजना प्रभावित क्षेत्रका बासिन्दाका लागि छुट्याइएको छ ।
उक्त शेयरमध्ये ९ लाख १० हजार कित्ता बझाङ, बैतडी र दार्चुलाका अति प्रभावित क्षेत्रका स्थानीयलाई वितरण गरिनेछ । बाँकी ४ लाख ९० हजार कित्ता भने सोही जिल्लाका अन्य प्रभावित क्षेत्रबाहेकका बासिन्दालाई उपलब्ध गराइने कम्पनीले जनाएको छ ।
यस्तै, सर्वसाधारणतर्फ छुट्याइएको शेयरमध्ये १० प्रतिशत अर्थात ३ लाख ५० हजार कित्ता (३ करोड ५० लाख रुपैयाँ बराबर) शेयर श्रम स्वीकृति लिएर वैदेशिक रोजगारीमा रहेका नेपालीका लागि निष्काशन गरिएको छ ।
आईपीओमा आवेदन दिन न्यूनतम १० कित्ता र अधिकतम २० हजार कित्तासम्म आवेदन दिन सकिने व्यवस्था गरिएको छ । स्थानीय बासिन्दाका लागि आवेदन अवधि छिटोमा चैत २४ गतेसम्म रहनेछ भने ढिलोमा वैशाख ९ गतेसम्म खुला रहनेछ । वैदेशिक रोजगारीमा रहेका नेपालीका लागि भने छिटोमा चैत १५ गते र ढिलोमा चैत २४ गतेसम्म आवेदन दिन सकिनेछ ।
कम्पनीको वित्तीय अवस्थालाई मूल्याङ्कन गर्दै केयर रेटिङ्ग नेपालले ‘केयरएनपी डबल बी’ इस्यूअर रेटिङ्ग प्रदान गरेको छ, जसले दायित्व वहन क्षमतामा मध्यम स्तरको जोखिम रहेको संकेत गर्छ ।
