काठमाडौं । बैंकिङ कसूरसम्बन्धी अनुसन्धानका क्रममा प्रहरीले प्रभु बैंकका एक उच्च अधिकारीलाई पक्राउ गरेको छ ।
नेपाल प्रहरीको केन्द्रीय अनुसन्धान ब्यूरो (सीआईबी)ले प्रभु बैंकको ‘कर्पोरेट एन्ड प्रोजेक्ट फाइनान्स’ विभाग प्रमुख दिनेश डंगोललाई नियन्त्रणमा लिएको हो । उनीमाथि बैंकिङ कसूरसम्बन्धी मुद्दामा अनुसन्धान भइरहेको प्रहरीले जनाएको छ ।
सीआईबीका अनुसार यसअघि नै अनुसन्धानको दायरामा रहेका अशोक शेरचनसँग सम्बन्धित प्रकरणमा डंगोलको संलग्नता देखिएपछि उनलाई पक्राउ गरिएको हो । ललितपुर महानगरपालिका–२७ (साविक सुनाकोठी) स्थायी घर भएका ५० वर्षीय डंगोललाई काठमाडौंको थापाथली क्षेत्रबाट विशेष टोलीले नियन्त्रणमा लिएको थियो ।
अनुसन्धानका क्रममा डंगोलले प्रभु बैंकबाट ‘प्रभु म्यानेजमेन्ट प्रा.लि.’ मा प्रवाह गरिएको कर्जाको दुरुपयोग गरेको तथा नेपाल राष्ट्र बैंकको निर्देशन र प्रचलित कानून विपरीत काम गरेको आरोप लागेको छ । सीआईबीले संकलन गरेका प्रमाण र विज्ञ टोलीको विश्लेषणका आधारमा उनीविरुद्ध बैंकिङ कसूर तथा सजाय ऐन, २०६४ अन्तर्गत कारबाही अघि बढाइएको हो ।
सीआईबीका प्रवक्ता तथा प्रहरी वरिष्ठ उपरीक्षक शिवकुमार श्रेष्ठका अनुसार उच्च अदालत पाटनबाट पक्राउ अनुमति लिएर उनलाई २०८१ चैत २ गते पक्राउ गरिएको हो । हाल अदालतबाट म्याद थप गरी डंगोललाई हिरासतमा राखेर थप अनुसन्धान भइरहेको प्रहरीले जनाएको छ ।
काठमाडौं । चालू आर्थिक वर्ष (आव) २०८२/८३ को पहिलो आठ महिनामा कैलाली भन्सार कार्यालयले साढे ५ अर्ब राजस्व संकलन गरेको छ । गत साउनदेखि फागुन मसान्तसम्मको अवधिमा भएको ५ अर्ब ४० करोड ६७ लाख रुपैयाँ संकलन कार्यालयको वार्षिक लक्ष्यको करिब ५५.६७ प्रतिशत हो ।
कार्यालयका सूचना अधिकारी प्रकाश तिमिल्सिनाका अनुसार यस अवधिमा भन्सार महसुलतर्फ २ अर्ब ८४ लाख, मूल्य अभिवृद्धि करतर्फ २ अर्ब ७ करोड ५९ लाख, अन्तःशुल्कबाट १० करोड ५६ लाख र अन्य शीर्षकमा १ अर्ब २१ करोड ६६ लाख रुपैयाँ राजस्व उठेको छ । चालू आवका लागि कार्यालयलाई ९ अर्ब ७१ करोड १५ लाख राजस्व संकलन गर्ने लक्ष्य दिइएको छ ।
यद्यपि, आवका कुनै पनि महिनामा लक्ष्यअनुसार राजस्व संकलन हुन सकेको छैन । साउनदेखि फागुनसम्म प्रत्येक महिनामा लक्ष्यभन्दा कम संकलन भएको तथ्यांकले देखाउँछ । फागुन महिनामा भने लक्ष्यसँग नजिक पुग्दै ७६ करोड ४४ लाख उठाइएको छ, जुन सो महिनाको लक्ष्यभन्दा झण्डै ७० लाखले कम हो ।
यसअघि पनि कार्यालयले लक्ष्यअनुसार उपलब्धि हासिल गर्न सकेको थिएन । गत आव २०८१/८२ मा ११ अर्ब १६ करोड २६ लाख राजस्व संलन गर्ने लक्ष्य राखिए पनि वास्तविक संकलन ८ अर्ब ६६ करोड ९८ लाखमा सीमित भएको थियो, जुन लक्ष्यको करिब ७७.६७ प्रतिशत मात्रै हो ।
