काठमाडौं । सोमबार बिहान न्यूयोर्कको लागार्डिया विमानस्थलमा एयर क्यानाडा एक्सप्रेसको एक यात्रुवाहक जहाज रनवेमा ठोक्किँदा उडानहरू प्रभावित भएका छन् । माउन्ट्रियलबाट आउँदै गरेको विमानले रनवेमा रहेको गाडीमा ठक्कर दिएको बताइएको छ ।
एएफपीका अनुसार घटनास्थलका केही दृश्यहरू सामाजिक सञ्जालमा सार्वजनिक भएका छन्, जसमा विमानको अगाडिको भाग र ककपिट क्षेत्र गम्भीर क्षतिग्रस्त देखिन्छ । उद्धार तथा आपत्कालीन सेवाहरू तुरुन्तै घटनास्थलमा पुगेका छन् ।
संयुक्त राज्य नागरिक उड्डयन प्रशासनले सम्पूर्ण उडानहरूमा ग्राउन्ड स्टप जारी गरेको छ भने स्थानीय आपत्कालीन अधिकारीहरूले यात्रुहरूलाई रद्द वा ढिलाइ हुने सम्भावनाबारे सचेत गराएका छन् । घटनामा घाइतेको संख्या अहिलेसम्म आधिकारिक रूपमा पुष्टि भएको छैन । दुर्घटनाको अनुसन्धान जारी रहेको छ ।
