काठमाडौँ । देशले आज नयाँ प्रधानमन्त्री पाउँदैछ। राष्ट्रपति कार्यालय शीतल निवासमा तय गरिएको कार्यक्रमअनुसार आज दिउँसो राष्ट्रपति रामचन्द्र पौडेलले राष्ट्रिय स्वतन्त्र पार्टीका वरिष्ठ नेता बालेन्द्र शाहलाई प्रधानमन्त्री पदको शपथ गराउनेछन्।
राष्ट्रपति कार्यालयका अनुसार शपथअघि शाहलाई औपचारिक रूपमा प्रधानमन्त्रीमा नियुक्त गरिनेछ। नेपालको संविधानको धारा ७६(१) अनुसार एकल सरकार गठन हुने तयारी गरिएको हो।
अपराह्न तय गरिएको शपथ ग्रहण समारोहमा विभिन्न राजनीतिक दलका शीर्ष नेता, कूटनीतिक नियोगका प्रतिनिधि, नागरिक समाजका अगुवा तथा उच्च सरकारी अधिकारीलाई आमन्त्रण गरिएको छ। प्रधानमन्त्रीसँगै मन्त्री परिषद्का सदस्यहरूको पनि शपथ हुने बताइएको छ।
गत फागुन २१ मा सम्पन्न प्रतिनिधिसभा निर्वाचनमा राष्ट्रिय स्वतन्त्र पार्टीले उल्लेखनीय सफलता हासिल गर्दै १८२ सिट जितेको थियो। सोही आधारमा दलले बिहीबार बालेन्द्र शाह लाई संसदीय दलको नेता चयन गरेको हो।
झापा क्षेत्र नम्बर ५ बाट उम्मेदवारी दिएका शाहले ६८ हजार ३४८ मत प्राप्त गर्दै विजयी भएका थिए। यसअघि प्रतिनिधिसभाका ज्येष्ठ सदस्य अर्जुननरसिंह केसी ले नव-निर्वाचित सांसदहरूलाई पद तथा गोपनीयताको शपथ गराइसकेका छन्।
