काठमाडौं । सरकारले भारतसहित विभिन्न ६ देशमा कार्यरत नेपाली राजदूतहरूलाई फिर्ता बोलाउने निर्णय गरेको छ । मन्त्रिपरिषद्को हालैको बैठकबाट उक्त निर्णय भएको परराष्ट्र मन्त्रालय स्रोतले जनाएको हो ।
फिर्ता बोलाइएका राजदूतहरूमा भारतका लागि डा. शङ्करप्रसाद शर्मा, दक्षिण कोरियाका लागि डा. शिवमाया तुम्बाहाम्फे, अष्ट्रेलियाका लागि चित्रलेखा यादव, श्रीलङ्काका लागि डा. पूर्णबहादुर नेपाली, डेनमार्कका लागि सुम्निमा तुलाधर तथा दक्षिण अफ्रिकाका लागि कपिल श्रेष्ठ रहेका छन् ।
यी सबै राजदूतहरू तत्कालीन केपी शर्मा ओली नेतृत्वको सरकारले नियुक्त गरेका थिए । सरकारको पछिल्लो निर्णयसँगै भारत, चीन, अमेरिका लगायत करिब १७ देशमा नेपाली कूटनीतिक नियोगहरू नेतृत्वविहीन भएका छन् ।
