काठमाडौं । नेपाल आयल निगमले इन्धनको मूल्यमा फेरि वृद्धि गरेको छ । निगमले बुधबार जारी गरेको प्रेस विज्ञप्तिअनुसार नयाँ मूल्य वैशाख ३ गते (बिहीबार) राति १२ बजेदेखि लागू भएको हो ।
नयाँ समायोजनअनुसार डिजेल र मट्टीतेलको मूल्य प्रतिलिटर ३० रुपैयाँले बढाइएको छ भने आन्तरिक हवाई इन्धनमा प्रतिलिटर ५ रुपैयाँ वृद्धि गरिएको छ । यद्यपि पेट्रोलको मूल्य भने हाललाई यथावत् राखिएको निगमले जनाएको छ ।
समायोजनपछि पहिलो वर्गका क्षेत्रमा डिजेल र मट्टीतेलको खुद्रा मूल्य प्रतिलिटर २३४ रुपैयाँ ५० पैसा पुगेको छ । दोस्रो वर्गमा यसको मूल्य २३६ रुपैयाँ कायम भएको छ भने तेस्रो वर्गमा प्रतिलिटर २३७ रुपैयाँ निर्धारण गरिएको छ ।
त्यस्तै, आन्तरिक हवाई इन्धनको मूल्य प्रतिलिटर २५१ रुपैयाँबाट बढेर २५६ रुपैयाँ पुगेको छ । निगमले पटकपटक मूल्य समायोजन गरिए पनि अझै घाटामा रहेको अवस्था रहेको जनाएको छ ।
