काठमाडौं । अछामको ढकारी गाउँपालिकामा चलचित्र निर्माणको बहानामा बजेट हिनामिना गरिएको आरोपमा गाउँपालिका अध्यक्षसहित चार जनाविरुद्ध विशेष अदालतमा भ्रष्टाचार मुद्दा दायर भएको छ ।
अख्तियार दुरुपयोग अनुसन्धान आयोगका अनुसार गाउँपालिकाले ‘अन्धपथ’ नामक चलचित्र निर्माणका लागि नियमविपरीत १५ लाख रुपैयाँको सम्झौता गरेको थियो । उक्त चलचित्र राजेश हमालको निर्देशनमा निर्माण गरिने भनिए पनि प्रक्रिया मिचेर करिब १२ लाख ७५ हजार रुपैयाँ भुक्तानी गरिएको जनाइएको छ ।
यस प्रकरणमा गाउँपालिका अध्यक्ष प्रकाशबहादुर साउद, तत्कालीन निमित्त प्रमुख प्रशासकीय अधिकृत लक्ष्मण शाह र लेखापाल विमल साउदलाई प्रतिवादी बनाइएको छ । त्यस्तै, चलचित्र निर्माणको जिम्मा पाएको आरजे ट्वान्टी फोर न्यूज तथा नव इन्द्रेणी फाउण्डेशन काठमाडौंका अध्यक्ष रामजी लम्साल (रामबहादुर लम्साल) लाई पनि मुद्दामा समावेश गरिएको छ ।
अख्तियारले चारै जनासँग जनही १२ लाख ७७ हजार २५० रुपैयाँ बिगो असुल गर्न मागदाबी गरेको छ ।
अभियोगपत्रमा कानुनले तोकेको २० प्रतिशतभन्दा बढी पेस्की दिन नपाइने व्यवस्था उल्लंघन गर्दै ५८ प्रतिशतसम्म पेस्की उपलब्ध गराइएको उल्लेख छ । साथै, घर भाडा तथा अन्य खर्चका नाममा नक्कली बिल पेश गरी रकम निकासा गरिएको आरोप पनि लगाइएको छ ।
यस्तै, हिउँदे अधिवेशनमार्फत कार्यक्रम संशोधन र रकमान्तर गरेर मिलेमतोमा रकम हिनामिना गरिएको अख्तियारको दाबी छ ।
