देशको ४३औँ प्रधानमन्त्रीमा राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह (बालेन) नियुक्त भएका छन्। राष्ट्रपति रामचन्द्र पौडेलले शुक्रबार बिहान ९ चैत २०८२ मा उनलाई उक्त पदमा नियुक्त गरेका हुन्।

नवनियुक्त प्रधानमन्त्री शाहले आजै दिउँसो १२ः३४ बजे पद तथा गोपनीयताको शपथ लिने कार्यक्रम तय भएको छ। शीतलनिवासमा आयोजना हुने विशेष समारोहमा राष्ट्रपति पौडेलले उनलाई शपथ गराउनेछन्।

यससँगै आजै मन्त्रिपरिषद् विस्तारको तयारी पनि गरिएको छ। रास्वपा स्रोतका अनुसार हालसम्म १० जना मन्त्रीको नाम टुंगो लगाइसकिएको छ।

यी हुन् १० मन्त्रीहरू

शिशिर खनाल– परराष्ट्रमन्त्री

स्वर्णिम– अर्थमन्त्री 

गृहमन्त्री– सुदन गुरुङ

कानुनमन्त्री– सोविता गौतम

सामान्य प्रशासनमन्त्री– प्रतिभा रावल

महिला बालबालिका– सीता वादी 

भौतिक पूर्वाधारमन्त्री– सुनील लम्लास 

उद्योगमन्त्री– अमरेशकुमार सिंह

ऊर्जामन्त्री– विराज भक्त श्रेष्ठ

स्वास्थ्यमन्त्री– निशा मेहता
 

काठमाडौं । बालेन्द्र शाह नेतृत्वमा बन्ने नयाँ सरकारमा अर्थ मन्त्रालय स्वर्णिम वाग्ले र परराष्ट्र मन्त्रालय शिशिर खनालले सम्हाल्ने लगभग निश्चित भएको छ ।

राष्ट्रिय स्वतन्त्र पार्टी (रास्वपा) का सभापति रवि लामिछाने र वरिष्ठ नेता बालेन्द्र शाहबीच भएको पछिल्लो छलफलपछि यी दुई मन्त्रालयको जिम्मेवारी टुंगिएको पार्टीका एक शीर्ष नेताले जानकारी दिएका छन् ।

यसअघि २१ फागुनमा सम्पन्न निर्वाचन अभियानकै क्रममा सभापति लामिछानेले वाग्लेलाई भावी अर्थमन्त्रीका रूपमा प्रस्तुत गरेका थिए । उनले आगामी आर्थिक वर्षको बजेट तयारीमा समेत वाग्लेलाई संलग्न हुन आग्रह गरेका थिए ।

त्यस्तै, शिशिर खनाल यसअघि शिक्षामन्त्रीको जिम्मेवारी सम्हालिसकेका अनुभवी नेता हुन् । उनी रास्वपा र बालेन्द्र शाहबीचको एकता प्रयासमा पनि सक्रिय रूपमा सहभागी भएका थिए । हाल उनी पार्टीको अन्तर्राष्ट्रिय विभाग प्रमुखका रूपमा कार्यरत छन् ।

यसैबीच, गौतमलाई कानुन मन्त्रालयको जिम्मेवारी दिने निर्णय भएको छ । सुरुमा स्वास्थ्य मन्त्रालय दिने विषयमा छलफल भए पनि अन्ततः उनलाई कानुन मन्त्रालयमै जिम्मेवारी दिने सहमति भएको हो ।

गृह मन्त्रालयमा तीन नेताको दाबी
गृह मन्त्रालयको जिम्मेवारीका लागि भने रास्वपाभित्र प्रतिस्पर्धा देखिएको छ । नेता सुनिल लम्साल, उपसभापति डिपी अर्याल र सुधन गुरुङमध्ये एक जनालाई गृह मन्त्री बनाउने तयारी भइरहेको छ ।

प्रधानमन्त्रीका रूपमा अघि सारिएका बालेन्द्र शाहले सुशासनलाई प्राथमिकता दिँदै आफ्ना निकट सहयोगीलाई मन्त्री बनाउन चाहेको बताइन्छ । यता सभापति लामिछानेको रोजाइ उपसभापति अर्यालतर्फ देखिएको छ ।

काठमाडौं । प्रतिनिधिसभाका नव–निर्वाचित सांसदहरूले आज पद तथा गोपनीयताको शपथ ग्रहण गरेका छन् । सिंहदरबारस्थित नयाँ संसद् भवनमा आयोजित समारोहमा २७४ जना सांसदले शपथ लिएका हुन् ।

संसद्का ज्येष्ठ सदस्य अर्जुननरसिंह केसीले उनीहरूलाई शपथ गराएका थिए । शपथ ग्रहणका क्रममा ४७ जना सांसदले १७ विभिन्न मातृभाषामा शपथ लिएका थिए भने सांसदहरू आ–आफ्नो परम्परागत भेषभूषामा उपस्थित भएका थिए ।

संसद् भवनको मुख्य हल निर्माण सम्पन्न नभएकाले कार्यक्रम बहुउद्देश्यीय हलमा आयोजना गरिएको संसद् सचिवालयले जनाएको छ ।

यसअघि ज्येष्ठ सदस्य केसीले बुधबार राष्ट्रपति रामचन्द्र पौडेलसमक्ष पद तथा गोपनीयताको शपथ लिएका थिए । नेपालको संविधानको धारा ९९ र धारा ९१ को उपधारा (५) तथा प्रतिनिधिसभा सदस्य निर्वाचन ऐन, २०७४ को दफा ७५ अनुसार सांसदहरूले शपथ लिनुपर्ने व्यवस्था छ ।

गत फागुन २१ गते सम्पन्न प्रतिनिधिसभा सदस्य निर्वाचनको परिणामअनुसार राष्ट्रिय स्वतन्त्र पार्टी (रास्वपा) ले १८२ सिट जितेको छ । त्यसैगरी नेपाली कांग्रेसले ३८, नेकपा (एमाले)ले २५, नेपाल कम्युनिस्ट पार्टीले १७, श्रम संस्कृति पार्टीले ७ र राष्ट्रिय प्रजातन्त्र पार्टीले ५ सिट प्राप्त गरेका छन् ।

शपथको अंश यस्तो छ– 

म मुलुक र जनताप्रति पूर्ण बफादार रही, सत्यनिष्ठापूर्व प्रतिज्ञा गर्छु । ईश्वरको नाममा शपथ लिन्छु कि नेपालको सार्वभौसत्ता, राजकीय सत्ता, नेपाली जनतामा रहेको नेपालको संविधानप्रति पूर्ण बफादार रहँदै प्रतिनिधिसभा सदस्य पदको कामकाज प्रचलित कानुनको अधिनमा रही मुलुक र जनताको सोझो चिताई, कसैको डर नमानी, पक्षपात नगरी, पूर्वाग्रह वा खराव भावना नलिई पदीय गोपनीयता कायम राखी इमानदरितासाथ काम गर्नेछु ।

काठमाडौं । साताको अन्तिम कारोबार दिन बिहीबार नेपाल स्टक एक्सचेन्ज (नेप्से) परिसूचकमा सुधार देखिएको छ । सो दिन नेप्से १४ दशमलव २१ अंकले उकालो लाग्दै २ हजार ९५० दशमलव १६ बिन्दुमा पुगेर बन्द भएको हो ।

कारोबारतर्फ भने अघिल्लो दिनको तुलनामा केही कमी आएको छ । आज ३ करोड ४ लाख ३८ हजार ३१५ कित्ता शेयर खरिद–बिक्री हुँदा कुल १३ अर्ब १६ करोड २२ लाख रुपैयाँ बराबरको कारोबार भएको छ । यसअघि बुधबार १५ अर्ब ९ करोड ४ लाख रुपैयाँको कारोबार भएको थियो ।

आजको बजारमा १७८ कम्पनीका शेयर मूल्य बढेका छन् भने ८० कम्पनीको मूल्य घटेको छ । त्यस्तै ८ कम्पनीको मूल्य स्थिर रहँदा कुल ३४३ धितोपत्र कारोबारमा सहभागी भएका छन् ।

समूहगत उपसूचकतर्फ अधिकांश हरियालीमा देखिएका छन् । हाइड्रोपावर १ दशमलव ५६, उत्पादन तथा प्रशोधन १ दशमलव ५, होटेल तथा पर्यटन शून्य दशमलव ८१, अन्य शून्य दशमलव ६५, लगानी शून्य दशमलव ५१, निर्जीवन बीमा शून्य दशमलव ४३, बैकिङ शून्य दशमलव ३७, फाइनान्स शून्य दशमलव १७ र माइक्रोफाइनान्स समूहको उपसूचक शून्य दशमलव २ प्रतिशतले बढेको छ ।

यस्तै व्यापार २ दशमलव ८४, विकास बैंक शून्य दशमलव ०५ र जीवन बीमा समूहको उपसूचक शून्य दशमलव ०४ प्रतिशतले घटेको छ । यसैगरी म्युचुअल फण्ड स्थिर रह्यो ।

आज ६ कम्पनीको शेयर मूल्यमा सकारात्मक सर्किट लागेको छ । सर्किट लाग्नेमा सुपर खुदी हाइड्रोपावर, सोलु हाइड्रोपावर, रिलाइन्स स्पीनिङ मिल्स, होटल फरेष्ट इन, भुजुङ्ग हाइड्रोपावर र साल्पा विकास बैंक रहेका छन् । यस्तै होटल फरेष्ट इनको शेयर मूल्य ९ दशमलव ९६ प्रतिशतले बढेको छ ।

यसैगरी पञ्चकन्या माइ हाइड्रोपावर ७ दशमलव ४८, सिन्धु विकास बैंक ३ दशमलव ५८, कर्पोरेट डेभलपमेन्ट बैंक ३ दशमलव २४, विशाल बजार कम्पनी ३ दशमलव ०४ र एनआईबीएल ग्रोथ फण्डको शेयर मूल्य २ दशमलव ६ प्रतिशतले ह्रास आएको छ ।

काठमाडौं । गत भदौ २३ र २४ मा भएको जेनजी आन्दोलनमा ७६ जनाको ज्यान गएको छ । आन्दोलनको घटनाबारे गठन गरिएको जाँचबुझ आयोगको प्रतिवेदन अनुसार यीमध्ये २४ जनाको मृत्यु आन्दोलनकारीकै क्रियाकलापबाट भएको थियो ।

प्रतिवेदनमा उल्लेख भएअनुसार आन्दोलनकारीको हिंसाबाट मारिएका २४ मध्ये एक विदेशी नागरिकसमेत छन् । काठमाडौको हायात होटलमा भारतीय नागरिकको मृत्यु भएको थियो । साथै, आन्दोलनकारीको कुटपिटबाट तीन प्रहरीको मृत्यु भएको थियो । पाँच जनाको भने विभिन्न भवनमा आगलागीमा परेर ज्यान गएको थियो ।

निजी प्रतिष्ठानमा काम गर्ने कर्मचारी र सर्वसाधारण गरी तीन जनाको पनि आन्दोलनकारीको आगलागीमा मृत्यु भएको छ । भाटभटेनी क्षेत्रमा जलेको अवस्थामा फेला परेका १२ जनाको भने अझै सनाखत हुन सकेको छैन । प्रतिवेदना अनुसार ३२ जनाको मृत्यु लुटपाटका क्रममा भएको हो ।

यस्तै प्रहरीको गोली लागेर ४२ जनाको मृत्यु भएको थियो भने १० जना कैदीबन्दीको भाग्ने क्रममा गोली प्रहारबाट ज्यान गुमाएका थिए ।

यीमध्ये तीन प्रहरी र प्रहरीको गोली लागेर मृत्यु भएका ४२ जनालाई सरकारले सहिद घोषणा गरेको छ ।

उक्त दुई दिनका घटनामा ७६ जनाले ज्यान गुमाएका थिए । “यी घटनामा दुई हजार ५२२ जना (सुरक्षाकर्मीसहित) घाइते भएका थिए र साथै करिब ८५ अर्ब रुपैयाँबराबरको भौतिक क्षति भएको देखिन्छ,” प्रतिवेदनमा भनिएको छ ।

काठमाडौं । नेपाली बजारमा सुनचाँदीको मूल्यमा गिरावट आएको छ । आज सुनको भाउ प्रतितोला २९ सय रुपैयाँले घटेको हो ।

नेपाल सुनचाँदी व्यवसायी महासंघका अनुसार आज सुनको मूल्य प्रतितोला २ लाख ८५ हजार ६०० रुपैयाँ कायम भएको छ । हिजो सुन प्रतितोला २ लाख ८८ हजार ५०० रुपैयाँमा कारोबार भएको थियो ।

त्यस्तै, चाँदीको मूल्य पनि घटेको छ । आज चाँदी प्रतितोला १०० रुपैयाँले घटेर ४ हजार ८२० रुपैयाँ पुगेको छ । अघिल्लो दिन चाँदी प्रतितोला ४ हजार ९२० रुपैयाँमा कारोबार भएको थियो ।

काठमाडौं । नवनिर्वाचित प्रतिनिधिसभा सदस्यहरूले आज दिउँसो २ बजे पद तथा गोपनीयताको शपथ लिने कार्यक्रम तय गरिएको छ । संघीय संसद् सचिवालयका अनुसार शपथ समारोहका सम्पूर्ण तयारी पूरा भइसकेका छन् ।

सचिवालयका प्रवक्ता एकराम गिरीका अनुसार प्रतिनिधिसभाका ज्येष्ठ सदस्य अर्जुननरसिंह केसीले सदस्यहरूलाई शपथ गराउने छन् । यसअघि राष्ट्रपति रामचन्द्र पौडेलले बुधबार केसीलाई नै पद तथा गोपनीयताको शपथ गराइसकेका छन् ।

शपथ ग्रहण कार्यक्रम सिंहदरबारस्थित नवनिर्मित बहुउद्देश्यीय हलमा आयोजना गरिनेछ । सचिवालयका अनुसार ४७ जना सदस्यले नेपालीबाहेक अन्य भाषामा शपथ लिने तयारी गरेका छन्, जसमध्ये १७ जनाले मैथिली भाषामा शपथ लिनेछन् ।

संविधानको धारा ९९ तथा धारा ९१ को उपधारा (५) र प्रतिनिधिसभा सदस्य निर्वाचन ऐन, २०७४ को दफा ७५ अनुसार सदस्यहरूले शपथ लिनुपर्ने व्यवस्था रहेको छ ।

सचिवालयले सबै सदस्यलाई निर्वाचन आयोगबाट प्राप्त प्रमाणपत्र, नागरिकताको प्रतिलिपि र दुई प्रति पासपोर्ट साइजको फोटोसहित तोकिएको समयभन्दा दुई घण्टा अगावै उपस्थित हुन अनुरोध गरेको छ । साथै, औपचारिक वा सांस्कृतिक पहिचान झल्किने पोसाकमा उपस्थित हुन आग्रह गरिएको छ ।

कार्यक्रमस्थलमा आवश्यक सिट व्यवस्थापन, रोष्टम, सभामुखको आसन तथा सचिवालयका पदाधिकारीहरूका लागि छुट्टै स्थानको तयारी गरिएको छ ।

गत फागुन २१ गते सम्पन्न निर्वाचनमा राष्ट्रिय स्वतन्त्र पार्टीले १८२ सिट जितेको छ भने नेपाली कांग्रेसले ३८, नेकपा (एमाले) ले २५, नेकपा ले १७, श्रम संस्कृति पार्टीले ७ र राष्ट्रिय प्रजातन्त्र पार्टीले ५ सिट हासिल गरेका छन् ।

काठमाडौं । कालिन्चोक हाइड्रोपावर लिमिटेडले सर्वसाधारणका लागि चैत २२ गतेदेखि आईपीओ निष्काशन गर्ने भएको छ । यसअघि कम्पनीले आयोजना प्रभावित स्थानीय बासिन्दा तथा वैदेशिक रोजगारीमा रहेका नेपालीहरूका लागि शेयर जारी गरी बाँडफाँट गरिसकेको छ ।

कम्पनीले जारी पूँजी ५५ करोड रुपैयाँको २५ प्रतिशत बराबर १३ करोड ७५ लाख रुपैयाँ मूल्यको १३ लाख ७५ हजार कित्ता शेयर निष्काशन गर्ने अनुमति पाएको थियो । यसमध्ये ५ लाख ५० हजार कित्ता शेयर स्थानीय बासिन्दालाई र ८२ हजार ५०० कित्ता शेयर वैदेशिक रोजगारीमा रहेका नेपालीहरूलाई वितरण भइसकेको छ ।

अब दोस्रो चरणअन्तर्गत कम्पनीले ४१ हजार २५० कित्ता शेयर सामूहिक लगानी कोषका लागि तथा १६ हजार ५०० कित्ता कर्मचारीका लागि छुट्याएको छ । बाँकी ६ लाख ८४ हजार ७५० कित्ता शेयर (६ करोड ८४ लाख ७५ हजार रुपैयाँ बराबर) सर्वसाधारणका लागि निष्काशन गरिनेछ ।

यस आईपीओमा लगानीकर्ताले न्यूनतम १० कित्ता र अधिकतम १० हजार कित्तासम्म आवेदन दिन सक्नेछन् । आवेदन दिने अन्तिम मिति छिटोमा चैत २५ गते र ढिलोमा २०८३ बैशाख ६ गतेसम्म तोकिएको छ ।

आईपीओका लागि केयर रेटिङ्ग नेपालले कम्पनीलाई ‘केयरएनपी डबल बी’ इस्यूअर रेटिङ्ग प्रदान गरेको छ, जसले कम्पनीको दायित्व वहन गर्ने क्षमतामा औसत जोखिम रहेको संकेत गर्दछ ।

काठमाडौं । राष्ट्रिय खेलकुद परिषद् (राखेप)ले अखिल नेपाल फुटबल संघ (एन्फा)लाई तीन महिनाको लागि निलम्बन गरेको छ।

राखेपका अनुसार एन्फाले बारम्बार दिइएको निर्देशन पालना नगरी, परिषद्को स्वीकृति बिना निर्वाचन सञ्चालन गरेको पाइएको छ। मंगलबार एन्फालाई पठाइएको २४ घण्टे स्पष्टीकरण जवाफ चित्तबुझ्दो नभएपछि परिषद्ले कारबाहीको निर्णय गरेको हो।

परिषद्ले जारी गरेको विज्ञप्तिमा भनिएको छ, “एन्फाले आफूलाई स्वायत्त संस्थाको रूपमा परिभाषित गरी परिषद्‌बाट माग गरिएबमोजिम चित्तबुझ्दो जवाफ प्राप्त भएको अवस्था विद्यमान नरहेको देखिन्छ ।”

यो निर्णय राखेपको कार्यकारी समितिको बुधबारको बैठकमा सर्वसम्मत रूपमा पारित भएको हो।